116 पटक पढिएको
धनगढी– नेकपा एमालेको स्थायी कमिटी बैठकले सोमबार सुदूरपश्चिम प्रदेश सरकारमा रहेका आफ्ना मन्त्रीहरुलाई फिर्ता बोलाउने निर्णय गरेपछि यहाँका मन्त्री अझै पर्ख र हेरको अवस्था रहेका छन्।
नेकपा एमालेका वरिष्ठ नेता माधव नेपाल खेमा अन्तर्गत रहेका यहाँका मन्त्रीहरु सो निर्णयपछि पनि अझैसम्म फिर्ता हुने मनस्थितिमा नदेखिएका हुन्।
प्रदेश सरकारका सामाजिक विकास मन्त्री कृष्णराज सुवेदीले पार्टीको निर्णयबारे आधिकारिक रुपमा जानकारी नआएको बताए। आफुहरु कसरी जानेबारे छलफलमा रहेको मन्त्री सुवेदीको भनाइ छ।
त्यस्तै, नेकपा एमालेको संसदीय दलका नेता समेत रहेका आन्तरिक मामिला तथा कानून मन्त्री प्रकाश शाहले पनि पार्टीको आधिकारिक निर्णय आएपछि कसरी अगाडि बढ्नेबारे निर्णय लिने प्रतिक्रिया दिए।
नेकपा एमालेले सुदूरपश्चिम प्रदेश सरकारलाई दिएको समर्थन फिर्ता लिने निर्णय गरेपछि माओवादी केन्द्रबाट मुख्यमन्त्री बनेका त्रिलोचन भट्ट नेतृत्वको सरकार अल्पमतमा परेको छ। अब मुख्यमन्त्री भट्टले आगामी ३० दिनभित्र प्रदेशसभामा विश्वासको मत लिनुपर्नेछ।
तर नेकपा एमालेका मन्त्रीहरु सरकारबाट फिर्ता नहुनेमा आफुहरु ढुक्क भएको सत्तारुढ दल नेकपा माओवादी केन्द्रका प्रमुख सचेतक अक्कल रावलले विश्वास व्यक्त गरे।
उनले भने, “उहाँहरुको बहुमत सदस्यहरु माधव समूहकै हुनुहुन्छ। त्यसैले उहाँ फिर्ता हुनुहुन्न। उहाँहरुलाई पार्टीले कारबाही गर्ने बलियो आधारमा पनि छैन। किनकी संसदीय दल नै अधिकार सम्पन्न भएकोले निर्णय लिने काम संसदीय दलको हुन्छ।”
हाल सुदूरपश्चिममा नेकपा एमाले र नेकपा माओवादी केन्द्रबीचको संयुक्त गठबन्धनको सरकार छ।
प्रदेश सरकारमा एमालेका ३ जना मन्त्री रहेका छन्। आन्तरिक मामिला तथा कानून मन्त्री प्रकाश शाह, सामाजिक विकास मन्त्री कृष्णराज सुवेदी र उद्योग, वन तथा वातावरण मन्त्रीमा माया भट्ट रहेकी छिन्। पछिल्लो समय आन्तरिक मामिला तथा कानून मन्त्री शाहले आर्थिक मामिला तथा योजना मन्त्रालयको पनि जिम्मेवारी सम्हालेका छन्।
सुदूरपश्चिम प्रदेश सभामा नेकपा एमालेका २५, माओवादी केन्द्रका १४, नेपाली काँग्रेसका १२ र जनता समाजवादी पार्टीका २ जना गरि ५३ जना प्रदेश सभा सदस्य रहेका छन्। माओवादी केन्द्रले एमालेमा प्रवेश गरेका पूर्व मन्त्री झपट बोहरालाई निष्कासन गरेपछि अब माओवादी केन्द्रमा १३ जना मात्रै रहेका छन्।
त्यस्तै, प्रदेश सभामा नेकपा एमालेका २५ जना ९सभामुख० प्रदेश सभा सदस्य रहेका छन्। जसमध्ये ६ जना मात्रै ओली समूह रहेका छन्। विधायन समितिका सभापति नेपालु चौधरी, प्रदेश सभा सदस्य लीलाधर भट्ट, ग्याल्बोसिंह बोहरा, पठानसिंह बोहरा, रतनबहादुर थापा र माया तामाङ ओली समूहमा छन्। बाँकी सभामुख बाहेक १८ जना प्रदेश सभा सदस्यहरु माधव समूहमा रहेका छन्।
प्रतिक्रिया
सम्बन्धित खवर
