बाजुरा,२४जेठ- शुक्रबार बुढीगंगा नगरपालिका–६ बाम्का बजारमा नवदुर्गा होटलमा खाना पकाउने ग्यासको सिलिण्डर पड्किएर आगलागी हुँदा ३५ पसल जलेर नष्ट भएको जिल्ला प्रहरी कार्यालय बाजुराले जनाएको छ ।
ग्यासको सिलिण्डर पड्किएर आगलागी हुँदा बाम्का बजारमा रहेका पसलहरु पुरै जलेर सखाप भएका छन् ।
आगलागीबाट ३५ पसलको क्षतिको विवरण संकलन गरिएको जिल्ला प्रहरी कार्यालय बाजुराका प्रहरी निरिक्षक तथा सूचना अधिकारी देवबहादुर चौधरीले जानकारी दिएका छन् ।
उनले दिएको जानकारी अनुसार प्रहरीले प्रारम्भिक रुपमा ३५ पसलको क्षतिको विवरण संकलन गरेको उक्त पसलको आठ करोड ७७ लाख ६५ हजार क्षति भएको बताए ।
प्रहरीको तथ्यांक अनुसार सबै भन्दा बढी योगनाथ न्यौपानेको किनारा पसलको एक करोड ८० लाख क्षति भएको पाइएको छ ।
यसैगरी आगलागीबाट तोयानाथ न्यौपानेको एक करोड ५० लाख,छत्र थापाको एक करोड ५० लाख र धनबहादुर साउँदको एक करोड ५० लाख क्षति भएको प्रहरीले संकलन गरेको प्रहरी निरिक्षक चौधरीले बताएका छन् ।
आगलागीबाट दिपक साउँद,रामु अयडी,तुल कटुवाल र उद्धव थापाको पसलको क्षतिको मूल्य खुल्न सकेको छैन ।
आगलागिबाट फैन्सी पसल मेडिकल,इलेक्ट्रोनिक, पुुस्तक पसल र होटलहरु जलेर नष्ट भएको प्रहरी निरिक्षक चौधरीको भनाई रहेको छ ।
आगलागीबाट भगतराज गिरीको सु प प्र ०१–००१प४६८१ नम्बरको मोटरसाइकल पनि जलेर नष्ट भएको छ ।
शुक्रबार दिउँसो ३ बजेर ३० मिनेटमा ग्यास सिलिण्डर पड्किएर आगलागि भएपनि स्थानीय तहले अग्नी नियन्त्रण दमकल खरिद नगर्दा ठूलो क्षति भएको पिडितहरुले गुनासो गरेका छन् ।
स्थानीय तहहरुमा दमकल कम क्षति हुनबाट जोगिने थियो,अग्नी पिडित छत्र थापाले बताएका छन् ।
आगलागीबाट पिडितहरुको तथ्यांक संकलन गरी उनीहरुलाई राहत र पुनस्थापनाका लागि जिल्ला विपद व्यवस्थापन समितिको शुक्रबार बसेको बैठकले प्रदेश र संघ सरकारसंग पिडितलाई राहत उपलव्ध गराउन माग गर्ने निर्णय गरेको छ ।
शुक्रबार आगलागि भएपछि सरकारका संस्कृति पर्यटन तथा नागरिक उड्ययनमन्त्री बद्रीप्रसाद पाण्डे पनि प्रभावित क्षेत्रमा पुगेको उहाँको निजी सचिवालयले जनाएको छ ।
मन्त्री पाण्डेले आगलागिको क्षतीको अगुनमन गर्ने र उनीहरुका गुनासा सुन्ने गरी प्रभावित क्षेत्रमा पुगेको सचिवालयले जानकारी दिएको छ ।