468 पटक पढिएको
बाजुरा= जिल्लालाई पूर्ण खोप सुनिश्चितता तथा दिगोपन जिल्ला घोषणा गरिएको छ । शनिबार जिल्ला खोप समन्वय समिति बाजुराको आयोजनामा १५ महिना देखि पाँच वर्ष मुनीका बालबालिकालाई सबै खाले खोप लगाएपछि जिल्लालाई पूर्ण खोप सुनिश्चिचता घोषणा गरिएको हो । जिल्लामा ३ हजार बालबालिकाको खोपको सर्वेक्षण गर्दा १२ जना बालबालिकाले कुनै पनि प्रकारको खोप नपाएको र ५७ बालबालिकाले आधा खोप लगाएको पाइएपछि उनीहरु सबैलाई सबै खालका खोप लगाएपछि जिल्लालाई पूर्ण खोप सुनिश्चितता घोषणा गरिएको हो ।
जिल्लाका ९ वटै पालिकाले प्रत्येक वडामा गएर खोपबाट छुटेका र खोप भन्दा बाहिर रहेकाको तथ्यांक संकलन गरी उनीहरुलाई खोपको पहुँचमा पु¥याउदै नगरपालिका र गाउँपालिका हुदै जिल्लालाई पूर्ण खोप सुनिश्चितता तथा दिगोपन घोषणा गरिएको स्वास्थ्य कार्यालय बाजुराका जनस्वास्थ्य अधिकृत महेश चन्दले जानकारी दिएका छन् । खोप कार्यक्रममा निरन्तर काम गर्ने तीन जना स्वास्थ्यकर्मीलाई सम्मान गरिएको छ । जनस्तरमा नै गएर बालबालिकाहरुको खोपबाट बञ्चित भएकालाई खोपको पहुँचमा ल्याउने राजेन्द्र बुढा सुवास रोकाया,सुनिता थापालाई प्रमाण पत्र र दोसल्ला ओढार सम्मान गरिएको हो ।
जिल्ला खोप समन्वय समितिका अध्यक्ष तथा जिल्ला समन्वय समिति बाजुराका प्रमुख तुलसीराम रोकायाको अध्यक्षतामा संचालन भएको कार्यक्रममा त्रिवेणी नगरपालिकाका नगर प्रमुख कर्णबहादुर थापा,बडीमालिका नगरपालिकाका नगर प्रमुख अमर खड्का,बुढीगंगा नगरपालिकाका नगर प्रमुख रामबहादुर बानिँया,खप्तड छेडेदह गाउँपालिकाका अध्यक्ष दीलबहादुर रावत,बुढीनन्दा नगरपालिकाका उप प्रमुख रामबहादुर बोहरा,गौमुल गाउँपालिकाका उपाध्यक्ष सिता थापा,प्रमुख जिल्ला अधिकारी पुष्कर खड्का अतिथी रहेका थिए ।
कार्यक्रममा सुरक्षाकर्मी,पत्रकार, महिला स्वयमसेविका र कार्यालय प्रमुखको सहभागीता रहेको थियो । स्वास्थ्य कार्यालय बाजुराका प्रमुख महेश चन्दले स्वागत मन्तव्य राखेका थिए । कार्यक्रमको संचालन युनिसेफका अशोक जोशीले गरेका थिए ।
