315 पटक पढिएको
बाजुराः खप्तड छेडेदह गाउँपालिका–२ जयवागेश्वरीको माटेसाँगुमा भाइरल ज्वरोको प्रकोपबाट दुई जनाको मृत्यु भएको छ । स्थानियका अनुसार मृत्यु हुनेमा सोही वडाकी ४९ वर्षीया सौरादेवी बुढा र ६२ वर्षीय कुलबहादुर शाही रहेको बताइएको छ । भाइरल ज्वरोका कारण बुढाको चार दिन पहिले र शाहीको आइतबार मृत्यु भएको स्थानीय दीर्घबहादुर शाहीले जानकारी दिएका छन् । उहाँका अनुसार गाउँमा रहेका एक सय ६० बढी परिवारको सबै घरमा बिरामी परेका छन् । २ जनाको मृत्यु भइसकेको छ । भाइरल ज्वरोले पुरै गाउँ नै प्रभावित रहेको जानकारी प्राप्त भएको छ।भाइरल ज्वराका कारण गाउँका एक दुई जना त सबै घरमा बिरामी परेको छन् । भाइरल ज्वरो फैलिएको एक हप्ता भइसकेको छ, उपचारका लागि पहल गर्दा पनि कतै बाट स्वास्थ्यकर्मी नआएको स्थानीयले गुनासो गरेका छन् । ज्वरो १०३ डिग्री माथि आउने, खोकी लाग्ने, शास फुल्ने जस्ता लक्षण देखा परेको स्थानीयले बताएका छन् । गाउँमा भाइरल ज्वरो फैलिएको खबर पाएपछि स्वास्थ्यकर्मीको टिम पठाउन लागेको स्वास्थ्य कार्यलय बाजुराका प्रमुख महेश चन्दले बताएका छन् ।
खप्तड छेडेदह गाउँपालिकाबाट दुइ जना स्वास्थ्यकर्मी पठाइसकेको र जिल्ला स्वास्थ्य कार्यालयबाट औषधी सहितको टोली पठाउन लागेको चन्दले बताए । भाइरल ज्वरोबाट जेष्ठ नागरिक, बालवालिका र दिर्घरोगी सबै भन्दा बढी प्रभावित भएका छन् । स्वास्थ्य चौकी १ घण्टा टाढा रहेकाले उपचारमा जान निकै समस्या भएको छ ।घरका सबै बिरामी परेका छन्, बोकेर लिने कोही छैन्, वर्षाद सडक बन्द भएपछि घरमै बिरामी परेर थला परेको स्थानिय गणेश शाहीले बताए ।वडा तथा पालिकामा पटक पटक जानकारी गर्दा पनि अहिले सम्म स्वास्थ्यकर्मी नपुगेको उनले बताए । गाउँपालिका अध्यक्ष दिल बहादुर रावत अनुसार स्वास्थ्यकर्मी टोली प्रभावित क्षेत्रमा पठाइसकेको बताएका छन् । भाइरल प्रकोप भएको गाउँमा ल्याब सहितको टोली पठाएका छौ, रोगको पहिचान गरेर नियन्त्रण नभए जिल्ला, प्रदेश, संघमा सहयोगका लागि खबर गर्ने रावतले बताएका छन ।पछिल्लो समय भाइरल ज्वरोको प्रकोप जिल्लाका सबै ठाँउमा धमाधम देखा पर्न थालेको छ ।
