104 पटक पढिएको
बाजुरा। बाजुराको स्वामीकार्तिक खापर गाउँपालिकामा उत्पादन भएको प्याजले बजार नपाउँदा कृषक चिन्तित बनेका छन् । वडा नम्बर १ बाहुनीका कृषकहरुले व्यावसायिक रूपमा प्याज खेती गरे पनि बजार नपाउँदा किसानहरु चिन्तित बनेका हुन् ।परम्परागत खेती छाडेर प्याज उत्पादन गरेका स्थानीयले बिक्री नहुँदा घरमै कुहिन थालेको छ । गहुँ, मकै खेती छाडेर प्याज खेती गरेका स्थानियले यो वर्ष अनुमानित ५ सय क्विन्टल प्याज उत्पादन गरेका छन । भण्डारण भएको प्याजले बजार नपाएपछि दैनिक कुहिएर खेर जान थालेको उनीहरूको गुनासो छ ।उत्पादन भएको प्याज दैनिकजसो कुहिएर खेर जान थाले पनि स्थानीय र प्रदेश सरकारबाट ढुवानीका लागि अनुदान पाएका छैन । ‘स्थानीयका घरगोठ प्याजले भरिएका छन् तर बजार पाइएको छैन’, वडा नम्बर १ बाहुनीका कालु विकले भने, ‘करिब ५ सय क्विन्टल प्याज खेर जाने अवस्थामा छ । गहुँ भन्दा प्याज दोब्बरले उत्पादन भए पनि बजार नहुँदा खेर जाने अवस्था आएको विकले सुनाए ।
कृषि ज्ञान केन्द्र बाजुराले बाहुनीलाई प्याज पकेट क्षेत्र घोषणा गरेपछि स्थानीय यो खेतीमा आकर्षित भएका थिए । केही वर्ष अगाडि आफूलाई तरकारी खान मात्र प्याज फलाउने गरेका स्थानीयले केही वर्षदेखी प्याज खेतीमा आर्कषीत भएका छन । उत्पादन राम्रो हुने भनेर कृषि ज्ञान केन्द्र बाजुराले स्थानीयलाई प्याज खेतीतर्फ आकर्षित गराए पनि अहिले बजारसम्म पुर्याउन समस्या भएको कृषकहरुले बताएका छन ।उत्पादित प्याज ‘स्थानीय बजारमा खपत हुन गाह्रो भएपछि स्वामिकार्तिक गाउँपालिका र कृषि ज्ञान केन्द्रले ढुवानी गर्ने तयारी गरिरहेको स्वामिकार्तिक खापर गाउँपालिकाका अध्यक्ष भरत रोकायाले बताएका छन । प्याज ढुवानीका लागि बजेट त छैन तर पनि कृषकहरुले उत्पादन गरेको साम्रगी ढुवानी गर्न गाउँपालिका लागिपरेको अध्यक्ष रोकायाले बताए ।
साप्पाटाको बाहुनी, काम्ती र रुढीमा उत्पादन भएको प्याज सदरमुकाम सम्म गाउँपालिकाले ढुवानी अनुदान दिने र त्यपछि धनगडी बजारमा निश्चीत भइसकेपछी कृषि ज्ञान केन्द्र बाजुराले ढुवानी गर्ने तयारीमा रहेको कृषि ज्ञान केन्द्र बाजुराका सुचना अधिकारी मिनप्रसाद जैशीले बताए । उत्पादन भएको प्याज घरमा राख्ने ठाउँ अभाव हुदा कृषि ज्ञान केन्द्रले भण्डारणका लागि सहयोग गरेको कृषि ज्ञान केन्द्र बाजुराका सुचना अधिकारी जैशीले बताए । यो बर्ष मात्र प्याजको पकेट क्षेत्रको रूपमा चिनिँदै आएको वडा नम्बर १ बाहुनीमा ४ सय भन्दा बढि कुइन्टल, रुढी र काम्तीमा २ सय बढि कुईन्टल प्याज उत्पादन भएको स्वामिकार्तिक खापर गाउँपालिका कृषि शाखाको तथ्याङकमा रहेको छ ।
ठूलो परिमाणमा उत्पादित प्याजले बजार पाउन नसक्दा उनीहरूको लागत समेत खेर जाने अवस्थामा भएपछि गाउँपालिकामा रहेको चण्डल बहुउदस्यि कृषि तथा पशुपन्छी र्फमले १ सय कुइन्टल प्याज बिक्रि गर्ने गरी कृषकबाट उठाएको फर्मका संचालक मेघराज शाहीले बताएका छन । ढुवानी बजारीकरणमा गाउँपालिका र कृषि ज्ञान केन्द्रले सहयोग तथा सहजीकरण गरेमा गाउँमा उत्पादीत सबै प्याज आफै लग्ने शाहीले बताए ।कृषकहरुबाट प्रति किलो ४२ रुपियाका दरले संकलन गरेको र ढुवानीमा बढि जाने भएकोले बजार सम्म महगोमा जाने चिन्ता रहेको चण्डल बहुउदस्यि कृषि तथा पशुपन्छी र्फमका संचालक शाहीले बताए । सरकारबाट ढुवानी अनुदान सहयोग भएमा बजारसम्म सस्तो दरमै हुने उनले बताए ।
