धनगढी– धनगढी उप–महानगरपालिकामा संघीय सरकार र प्रदेश सरकारको बजेटमा बनिरहेका १० विद्यालयको भवन निर्माणको काम अलपत्र परेको छ।

उप–महानगरपालिकाले प्रदेश र संघ सरकारको बजेटमा बन्ने ८ कोठे भवन निर्माण गर्न १० वटा विद्यालयहरूलाई छनौट गरेको थियो।
वडा नम्बर १० स्थित जनकल्याण माध्यमिक विद्यालय, १७ स्थित भानु माध्यमिक विद्यालय, १२ स्थित शादरा माध्यमिक विद्यालय, १२ कै दुर्गा आधारभूत विद्यालय, १३ स्थित नवज्योती आधारभूत विद्यालय, १३ कै जनता राष्ट्रिय माध्यमिक विद्यालय र वडा नम्बर १४ स्थित पञ्चोदय माध्यमिक विद्यालय थप ८ कोठे भवन निर्माणका लागि छनौट गरिएको थियो। ती विद्यालयहरूमा भवन निर्माणका लागि ८० लाखभन्दा बढी बजेट विनियोजन गरिएको छ।

त्यस्तै धनगढी उप–महानगरपालिका वडा नम्बर ९ स्थित सरस्वती आधारभूत विद्यालय र वडा नम्बर ६ स्थित धनगढी पोलिटेक्निक इन्स्टिच्युटको थप ४ कोठे भवन निर्माणका लागि छनौट गरिएको छ। ती ४ कोठे भवन निर्माणका लागि ५५ लाखभन्दा बढी बजेट विनियोजन गरिएको छ।
उपमहानगर भित्रका १० वटा विद्यालयहरूमा थप ८ कोठे भवन निर्माण गर्न गत आर्थिक वर्ष र चालु आर्थिक वर्षमा सम्झौता भएको थियो। तर कतिपय विद्यालयको भवन निर्माण काम अलपत्र परेको छ भने, कतिपय विद्यालयको भवन निर्माणको काम कछुवा गतिमा चलिरहेको छ।

धनगढीको त्रिनगर माध्यमिक विद्यालयमा ८ कोठे दुई तले भवन निर्माणका लागि गत आर्थिक वर्षको जेठमा सम्झौता भएको थियो। ८६ लाखको लागतमा बन्ने सो भवन आगामी आर्थिक वर्षको भदौमा सक्नुपर्ने छ। तर निर्माण कार्य सुरू भएको एक वर्ष पूरा हुँदा समेत पहिलो तलाको छत पनि हाल्न सकिएको छैन।

त्रिनगर माध्यमिक विद्यायका प्रधानाध्यापक भुपालसिंह खड्काले गत वर्षको दशैँसम्म काम राम्रोसँग भएपनि अहिले सन्तोषजनक रूपमा काम हुन नसकेको बताए। ‘गत वर्षको दशैँसम्म काम रफ्तारमा भयो’ उनले भने, ‘त्यसपछि चैत महिनासम्म काम ठप्प भयो। अहिले काम निकै सुस्त गतिमा चलिरहेको छ।’

भवन निर्माणको ठेक्का पाएको किरन कन्स्ट्रक्सन प्रालि कैलालीले भने लकडाउनका कारण काम प्रभावित भएको बताएको छ। किरन कन्स्ट्रक्सन प्रालि कैलालीका प्रतिनिधि धर्मराज भट्टले लकडाउनका कारण जनशक्ति र सामानको ढुवानीमा समस्या हुँदा निर्माणको काम प्रभावित भएको बताए। तर सम्झौता अवधि भित्रै निर्माण सम्पन्न गरिसक्ने दाबी निर्माण कम्पनीको छ।

उता धनगढी उप–नगरपालिकाले भने लकडाउनले गर्दा दुइ महिना ढिलो गरी काम सुरू भएका बताएको छ। धनगढी उप–महानगरपालिकाका शहरी विकास तथा प्राविधिक शाखा प्रमुख दीजराज भट्टले लकडाउनले गर्दा दुइ महिना ढिलो गरी काम सुरू भएको बताए। ‘लकडाउनले गर्दा दुइ महिना ढिलो गरी काम सुरू भयो’ उनले भने, ‘अहिले वर्षाले केही प्रभावित भएको छ। तर सम्झौता अवधिमा काम सकिन्छ।’