279 पटक पढिएको
शुक्रराज बोहरा,बाजुरा– लगातार अविरल वर्षाका कारण बड्डीगाड खोलामा आएको बाढीले बगाएर बेपत्ता भएकी बुढीनन्दा नगरपालिका–३ लौठी रुखकी महिलाको शव मंगलबार फेला परेको जिल्ला प्रहरी कार्यालय बाजुराले जनाएको छ ।
बुढीनन्दा नगरपालिकामा रहेको बड्डीगाड खोलाले बगाउदा सोही नगरपालिका–३ की मोतिकला ल्वारको शव करिव २० किलोमिटर तल फेला परेको जिल्ला प्रहरी कार्यालय बाजुराका प्रहरी निरिक्षक तथा सूचना अधिकारी धनदेव साउँदले जानकारी दिएका छन् ।
उनले दिएको जानकारी अनुसार बेपत्ता भएकी महिलाको स्थानीय र प्रहरीले खोजी गर्दा बड्डीगाड खोलाको कालसिलमा फेला पारेको प्रहरी निरिक्षक साउँदले बताए ।
बेपत्ता भएकी महिलाको शव कोल्टी प्राथमिक स्वास्थ्य चौकीमा पोष्टमार्टम गरी आफन्तलाई बुझाएको प्रहरी निरिक्षक साउँदको भनाई रहेको छ ।
शवको पोष्ठटमार्टमपछि आफन्तले हिन्दु परम्परा अनुसार दाहसंस्कार गरेको स्थानीय धनबहादुर बोहराले बताए ।
बालक अँझै बेपत्ता
सोमबार त्रिवेणी नगरपालिका–५ किम्नीमा खोलाले बगाउँदा बेपत्ता भएका १३ वर्षीय बालक कमल बुढा अझै फेला परेका छैनन् ।
गाउँ नजिकै रहेको किम्नी खोलाले बगाउँदा बेपत्ता भएका बालकको प्रहरी र स्थानीयले खोजी गरेको भएपनि फेला नपरेको जिल्ला प्रहरी कार्र्यालय बाजुराका प्रहरी निरिक्षक धनदेव साउँदले बताए ।
घटनास्थलमा प्रहरीको टोली र स्थानीयहरुले खोजी गरिरहेका छन्, तर अहिलेसम्म पनि बालकको शव फेला नपरेको बताएका छन् ।
