222 पटक पढिएको
बाजुरा: गौमुल गाउँपालिका–६ चौकामा एक घरमा आगलागी भएको छ । आज बिहान करिव ७ बजेको समयमा बालबालिकाले चलाएको आगोबाट घरमा आगलागी भएको प्रहरी जनाएको छ ।
स्थानीय शेर बहादुर रोकायाको घरमा आगलागी भएको आफन्त सुरेश रोकायाले बताएका छन् । अगेनोमा रहेको आगोलाई बालकले चलाएपछि एकाएक घरमा आगलागी भएको हो । ७ वर्षका बालकले सलाईको काटी जलाएर किताबमा लगाएपछि घरमा आगालागी भएको जिल्ला प्रहरी कार्यालय बाजुराले जनाएको छ ।
आगलागीबाट करिव २ लाख ५० हजार बढीको क्षति भएको हुनसक्ने अनुमान गरिएको छ । आगलागीबाट नगद २० हजार सहित घरभित्र रहेका गहना, अन्नपात, लत्ताकपडा, लालपूर्जा, नागरिकता, प्रमाणपत्र लगायत सबै जलेर नष्ट भएका छन् ।
स्थानीयको सक्रियतामा आगो नियन्त्रणमा लिएपछि थप क्षति हुनबाट बचेको छ । जिल्ला प्रहरी कार्यालय बाजुराले जनाएको छ।
