साहित्यलाई सदैब  राम्रो नजरले हेर्ने मुक्तककार श्रेष्ठकाे साहित्य लेख्ने हातले थप तिख्रता पाओस्

साहित्यकार पुष्पा श्रेष्ठ ( पुसु) ९ उत्कृष्ट मुक्तकहरु

मुक्तक १

कहिले परदेशमा ज्यान जान्छ युवाको
साथैमा पछ्याउँदै ज्ञान जान्छ युवाको
रोजगारी देशमा सृजना गर्न सक्नुपर्छ
खाडी मुलुकतिर ध्यान जान्छ युवाको

मुक्तक २

प्रजा मार्ने बाहाना खोज्ने गर्छ सरकारले
कसरी भ्रष्टाचार गर्ने सोच्ने गर्छ सरकारले
निर्दोष सबैलाई त कारागारमा कोच्ने गर्छ
हेर जनतामा गोली ठोक्ने गर्छ सरकारले

मुक्तक ३

आँखाभरि घृणाकै आगो बलेको छ
सबैले भन्छन् जात प्रथा ढलेको छ
दलित जनजाती भनिरहन्छन् यहाँ
विद्यालयमै त बाहुनवाद चलेको छ

मुक्तक ४

विभिन्न समयको खेल हो जिन्दगी
आँसूको थोपाको भेल हो जिन्दगी
भन्नेहरूले यहीँ भन्ने गर्छन् महोदय
हाँसोसँगै रोदनको मेल हो जिन्दगी

मुक्तक ५
कहाँ सजाउँ तिम्रो तस्बिर आँखैमा आइरहेको छ
खै कहाँ राखुँ तिम्रो धोकालाई,मुटू बिझाइरहेको छ
कहिल्यै सम्झन नपरोस् तिमी मेरी थियौ या थिएनौ
कसरी भनौँ तिम्रो नै यादले पलपल सताइरहेको छ

मुक्तक ६

आँफैलाई दुःखमा पारी बोक्नु हुन्छ बुबा
छोराको आसलाई मारी बोक्नु हुन्छ बुबा
छोरा दिनरात कहाँ जान्छ थाहा नै हुँदैन
नाम्लो लगाईकन भारी बोक्नु हुन्छ बुबा

मुक्तक ७

बिहे गरेर पराई हुन रहर छैन् आमा
शब्दहरुले मन छुन रहर छैन् आमा
बिहे पछि आँसूले मुख धुनुपर्छ अरे,
आँसूले त मुख धुन रहर छैन् आमा।

मुक्तक ८

अरुको मनमा म हराउने नगर्नु कुरा
हजुरकै नामको लाउन मन छ चुरा
सिन्दुर पोते हजुरकै नामको लाउँछु
ढुक्क हुनुस् प्रिय म हजुरकै हुँ पुरा

मुक्तक ९

पुर्खाको बलिदान अनि उपहार हो देश नेपाल
हिमाल,पहाड र तराईको प्यार हो देश नेपाल
बहुभाषा,बहुधर्म,बहुसंस्कृति चिनारी देशको
विविधताले भरपूर एक संसार हो देश नेपाल

✍️ पुष्पा श्रेष्ठ ( पुसु )
– रुपा गाउँपालिका-७, कास्की