467 पटक पढिएको
बाजुरा/ जिल्लाको स्वामीकार्तिक खापर गाउँपालिकाले पालिकामा सिसि क्यामरा जडान गरेको छ । गाउँपालिकाले पालिका भित्रको कामको बारेमा जानकारी लिन तथा हरेक गतिविधि नियाल्नका लागि कार्यालयमा सिसी क्यामरा जडान गरेको गाउँ पालिका श्रोतले जनाएको छ । करिब १ लाख ५० हजार लागतमा सिसी क्यामरा खरीद गरी जडान गरेको गाउँपालिका अध्यक्ष भरत बहादुर रोकायाले जानकारी दिनुभएको छ ।
पालिका क्षेत्रको शान्ति सुरक्षा बलियो बनाई यस क्षेत्रलाई सुरक्षित, व्यवस्थित, कर्मचारीलाई नियमित बनाउन, कार्यालयमा हुने सामानको दुरुपयोगलाई रोक्नका लागि सिसि क्यामरा जडान गरीएको अध्यक्ष रोकायाले बताउनुभयो । गाउँपालिकामा पुग्ने सेवाग्राहीको सेवा छिटोछरितो गर्न अर्थात अन्यकाममा अलमलिएर सेवा प्रवाहमा आनाकानी गर्ने कर्मचारीको निगरानी राख्नका लागि पनि सिसि क्यामराले महत्वपुर्ण भुमिका खेल्ने आफुले बिश्वास लिएको गाउँपालिकाका अध्यक्ष भरत बहादुर रोकायाले बताउनुभएको छ ।
सिसि क्यामरा जडानसँगै पालिकामा हुने सेवा प्रवाहमा केही सहज हुने उहाँको अपेक्षा रहेको छ । सिसि क्यामरा जडानले काम नगरी सेवा ग्राहीलाई सहजै सेवा प्रदान नगरेर आलटाल गर्ने कर्मचारीको प्रवृत्तिलाई न्युनिकरण हुने अपेक्षा सेवाग्राहीको रहेको छ । पालिकामा सिसि क्यामरा जडानले पालिकाको कामकाजमा थप सहजता मिल्ने अध्यक्ष भरत बहादुर रोकायाले बताउनुभएको छ ।
