289 पटक पढिएको
बाजुराः जिल्लाको पुर्वी उत्तरी भेगको स्वामीकार्तिक खापर गाउँपालिका–१ मुक्तिकोटमा कुपोषणबाट ग्रसित एक बालिकाको मृत्यु भएको छ । कुपोषणले ग्रसित सोही वडाकी दुमली वि.क.की १७ महिने छोरी जमुना वि.क.को मृत्यु भएको मुक्तिकोट शहरी स्वास्थ्य केन्द्रका प्रमुख वृज वि.क.ले जानकारी दिएका छन् ।
प्रमुख वि.क.ले दिएको जानकारी अनुसार जन्मेदेखि नै बालिका कुपोषित भएको र पोषणयुक्त खानेकुराको अभावले बालिकाको उपचार नपाएर मृत्यु भएको बताएका छन् । आर्थिक अभावका कारण कुपोषित बालिकाको उपचार गर्न सम्भव नभएपछि मृत्यु भएको स्वास्थ्य केन्द्र प्रमुख वि.क.को भनाई रहेको छ ।
१७ महिने छोरी कुपोषणबाट प्रभावित भईरहदा आमाको पेटमा अर्को बच्चा रहेको र श्रीमान भारतमा रहेकाले उपचार गर्न नसकेको दुमली वि.क.ले बताएकी छिन् । कुपोषणबाट ग्रसित बालिकालाई उपचारका लागि मुक्तिकोट स्वास्थ्य चौकीले रिफर गरेपनि अन्यत्र लिने पैसा नहुदा घरै मृत्यु भएको उनले बताएकी छन् ।
।
सदरमुकाम मार्तडीमा रहेको अस्पताल बाजुरामा पोषण पुर्नस्थापना केन्द्र भएपनि त्यहाँसम्म पुर्याउन पैसा नहुदा मृत्यु भएको हो । मुक्तिकोट गाउँमा बैशाख यता मात्र २२ जना कडा कुपोषित बालबालिका रहेको इन्चार्ज वृज विकले बताएका छन् । २२ बालबालिकाले स्वास्थ्य संस्था मार्फत उपचार गरिरहेको उनले जानकारी दिएका छन् । ।
