442 पटक पढिएको
काठमाडौंः नेपाल आयल निगमले कैलालीको धनगढीस्थित सुदूरपश्चिम प्रादेशिक डिपो कैलालीकै गोदावरी नगरपालिकामा सार्ने भएको छ ।
निगमको भण्डारण क्षमता अभिवृद्धि परियोजनाका प्रमुख प्रदीपकुमार यादवले कैलालीको गोदावरीमा २० बिघा १६ कठ्ठा ८ धुर जग्गा डिपो स्थान्तरणका लागि पहिचान गरिएको जानकारी दिनुभयो ।
धनगढी उपमहानगरपालिकाको चटकपुरस्थित हालको डिपो घना बस्तीका बीचमा रहेको, न्यून क्षमताको रहेको, विस्तार गर्न नमिल्ने अवस्थाको भएको र भौतिक संरचनाहरु पनि अति पुराना तथा अपुग भएकाले अन्तर्राष्ट्रिय मापदण्ड पूरा गर्नु पर्ने वाध्यतालाई समेत ख्याल राखेर अहिलेको डिपो सार्न लागिएको उहाँले बताउनु भयो ।
२०३७ सालमा स्थापना गरिएको उक्त डिपोले हालको पेट्रोलियम पदार्थको माग धान्न नसक्नुका साथै भौतिक पूर्वाधार पनि जीर्ण भएकाले स्थान्तरण गर्नुपरेको यादवको भनाई छ ।
उहाँले २०८२ वैशाख पहिलो हप्ताभित्र डीपीआर एवं डिपो निर्माणको शिलान्यास गर्ने योजना रहेको पनि जानकारी दिनुभयो ।‘२०८४ साल वैशाखभित्र नयाँ डिपो सञ्चालनमा ल्याइने छ’– उहाँले भन्नुभयो। जग्गा अधिग्रहण र डिपो निर्माणका लागि ३ अर्ब ५० करोड लागत लाग्ने अनुमान गरिएको छ।
