बाजुरा,२३जेठ – जिल्लाको स्वामीकार्तिक खापर गाउँपालिकालाई शुक्रबार पूर्ण खोप सुनिश्चितता दिगोपना पालिका घोषणा गरिएको छ ।
गाउँपालिका स्वास्थ्य शाखाको आयोजनामा पालिकामा रहेका ५ वटै वडाका जन्मेदेखि ५९ महिनाका बालबालिकाहरुले सबै खालका खोप पाएको सर्वेक्षणपछि पालिकालाई पूर्ण खोप सुनिश्चितता दिगोपना घोषणा गरिएको हो ।
पालिकाका ५ वटै वडामा गरिएको खोपको सर्वेक्षण अनुसार बालबालिकाहरु कोही पनि खोपबाट बञ्चित नभएकाले दिगोपना घोषणा गरिएको गाउँपालिकाको स्वास्थ्य शाखाले जनाएको छ ।
गाउँपालिकाको ५ वडामा अनुगमन गर्दा जन्मेदेखि १५ महिनाका दुई सय २१ जना बालबालिका र १६ महिनादेखि ५९ महिनाका ६ सय ५४ जना बालबालिकाहरु नियमित रुपमा खोप पाइरहेकाले पूर्ण खोप सुनिश्चितता दिगोपना घोषणा गरिएको स्वास्थ्य शाखाका प्रमुख भक्त कैलाले जानकारी दिएका छन् ।
पालिकामा बालबालिकाहरुले राष्ट्रिय खोप तालिका अनुसार लगाउनुपर्ने पुरा खोप पाइरहेकाले बच्चाहरु कोही पनि खोपबाट बञ्चित नभएको शाखा प्रमुख कैलाले बताए ।
स्वास्थ्य मन्त्रालयको खोप तथा रोग नियन्त्रण महाशाखाले तय गरेका मापदण्डहरू पूरा गरेपछि बडीमालिका नगरपालिकाले पूर्ण खोप सुनिश्चित पालिका घोषणा गरेको स्वास्थ्य शाखा प्रमुख कैलाको भनाई रहेको छ ।
नगरपालिकामा आठ सय ७५ जना बालबालिकालाई आवश्यक सबै नियमित खोप पाइरहेको गाउँपालिका स्वास्थ्य शाखाले जनाएको छ ।
बाालबालिकाले उमेर समुह अनुरुप पाउनु पर्ने पूर्ण खोप झाडा, पोलियो, दादुरा, टिटानस जस्ता घातक रोगहरूबाट बचाउने भएकोले यसको पहुँच सबैसम्म पुर्याउनु अत्यन्त जरुरी छ ।
यहाँका बालबालिकाको स्वास्थ्य सुरक्षालाई प्राथमिकतामा राख्दै स्वास्थ्यकर्मीहरू, महिला स्वास्थ्य स्वयंसेविका, अभिभावक तथा सरोकारवाला निकायहरूको संयुक्त प्रयासमा पूर्ण खोप अभियानलाई सफल भएको गाउँपालिकाले जनाएको छ ।
पालिकालाई पूर्ण खोप सुनिश्चिता तथा दिगोपना बनाउन सहयोग गर्ने स्वास्थ्यकर्मी स्वास्थ्य स्वयमसेवीका कर्मचारी सरोकारवालालाई नियमितता गर्न सुझाव समेत दिइएको छ ।
स्वास्थ्य मानव जीवनको संवेदनशिल क्षेत्र हो, स्वास्थ्यकर्मी मानव जीवनका भगवन हुन त्यसैले स्वास्थ्यकर्मीहरुले सेवा प्रति कट्टीबद्ध भएर सेवामा लाग्न सुझाव दिएको थियो ।
गाउँपालिकामा पूर्ण खोप सुनिश्चितता हासिल गरेसंगै भविष्यमा पनि नियमित अनुगमन, जनचेतना अभिवृद्धि र स्वास्थ्य पूर्वाधारको सुदृढीकरण मार्फत पालिकाले खोप सेवाको दिगोपना कायम राख्ने योजना बनाएको जनाएको छ ।
गाउँपालिकाका कार्यबहाक अध्यक्ष तथा पूर्ण खोप सुनिश्चितताका संयोजक अमरबहादुर सिंह अध्यक्षतामा कार्यक्रम संचालन भएको हो । कार्यक्रममा ५ वटै वडाका वडा अध्यक्ष, कर्मचारी लगायत सहभागी थिए । कार्यक्रमको संचालन गाउँपालिका प्रशासन शाखा प्रमुख कुमेर शाहीले गरेका थिए ।