224 पटक पढिएको
बाजुरा,२७ जेठ- बुढीगंगा नगरपालिका–६ बाम्का बजारमा ग्यास सिलिण्डर पड्किएर भएको आगलागीबाट पिडितलाई आर्थिक संकलन गरी हस्तान्त्रण गरिएको छ ।
सोमबार बाम्का बजारका व्यापारीहरुले बुढीगंगा नगरपालिकाको बल्देदेखि डाव बजारसम्मका व्यापारीहरुबाट राहत संकलन गरेको नौ लाख तीन हजार दुई सय ८० रुपैया अग्नी पिडितलाई हस्तान्तरण गरेको पुस्कर शाहले बताएका छन् ।
उनका अनुसार बाम्का बजारका व्यवसायी टेक बहादुर बुढाको संयोजकत्वमा आर्थिक संकलन गर्न जुटेको टोलीले उक्त रकम संकलन गरी आगलागी भएको घटनास्थलमा नै जनप्रतिनिधी र स्थानीयहरुको सहभागितामा रकम हस्तान्तरण गरेको बताए ।
आर्थिक संकलन टोलस्ले बल्देदेखि डाव बजारसम्मका एक सय ६२ जना सहयोगीले सहयोग गरेको उक्त रकम पिडितलाई बुझाएको शाहको भनाई रहेको छ ।
आगलागीबाट पूर्ण रुपमा क्षति भएका १३ जनालाई ६२ हजार पाँच सय ६० रुपैया र आंशिक क्षति भएका ९ जनालाई १० हजारका दरले रकम हस्तान्तरण गरिएको शाहले भने । आगलागीबाट पीडित व्यवसायीहरुलाई तत्काल राहत, पुनःस्थापना गरी पुरानै अवस्थामा ल्याउने प्रयासका लागि आर्थिक संकलन अभियान सञ्चालन गरेको समेत बताए ।
व्यवसायीबाट संकलित रकम बुढीगंगाका नगर प्रमुख राम बहादुर बानियाँ, त्रिवेणी नगरपालिकाका नगर प्रमुख कर्णबहादुर थापा,उप प्रमुख कमला कुमारी जैशी(न्यौपाने) बुढीगंगा र त्रिवेणी नगरपालिकाका वडा अध्यक्ष लगायतले पीडितलाई रकम हस्तान्तरण गरेका हुन् ।
शुक्रबार दिउँसो ३ बजेर ३० मिनेटमा बाम्का बजारमा रहेको नवदुर्गा होटलमा सिलिण्डर ग्याँस पड्किएर आगलागी हुँदा कम्तिमा दुई दर्जन बढी पसलहरुमा क्षति भएको छ ।
त्यस्तै उक्त आगलागीबाट १९ करोड बढीको क्षति भएको प्रारम्भिक विवरण सार्वजनिक गरिएको छ ।
