बाजुरा,२८जेठ- धार्मिक तथा पर्यटकीय क्षेत्रका रुपमा रहेको प्रस्तावित बडीमालिका संरक्षण क्षेत्र सम्बन्धी स्थानीय समुदाय र सरोकारवाला निकायसंग छलफल गरिएको छ ।
बुधबार प्रकृति संरक्षण कोष नेपालको आयोजना र बडीमालिका नगरपालिकाको समन्वयमा बडीमालिका र अछामको रामारोशन वन क्षेत्र संरक्षणका लागि आवश्यक पहल र स्थानीय समुदायको भूमिकाको विषयमा छलफल गरिएको हो ।
पर्यटकीय सम्भावना बोकेको बडीमालिका र रामारोशनलाई संरक्षण गर्न तीनै तहका सरकारको प्रयास,नितीगत निर्णय र यसको फाइदाका विषयमा छलफल गरिएको प्रकृति संरक्षण प्रमुख लक्ष्मी जोशीले बताएका छन् ।
बडीमालिका क्षेत्रको भोगाधिकार र वनमा भएका अतिक्रमणहरुको अवस्था र यसलाई पर्यटकीय क्षेत्रका रुपमा लैजाने गरी प्रस्तावित रुपमा छलफल गरिएको बताए ।
छलफलमा बडीमालिका क्षेत्रमा सम्भाव्यता विना नै लगाइएका संरचना र यसको नक्सांकन र सिमांकन गर्न आवश्यक रहेको सहभागीहरुले बताएका छन् ।
दुई प्रदेशको बीचमा रहेको बडीमालिका सुदूरपश्चिम प्रदेश र कर्णाली प्रदेशको सिमाकंन गर्न आवश्यक रहेको सहभागीहरुले जाने दिएका छन् ।
बडीमालिका मात्र नभई रानीसैन,खप्तड,बुढीनन्दा,छेडेदह लगायतका क्षेत्रलाई पनि प्रस्तावित रुपमा वन संरक्षणमा लैजानुपर्ने नेपाल पत्रकार महासंघ बाजुराका सचिव प्रेमबहादुर रौलेले सुझाव दिएका छन् ।
धार्मिक तथा पर्यटकीय रुपमा प्रचुर सम्भावना बोकेका क्षेत्रलाई संरक्षित क्षेत्र बनाउनका लागि संस्थाले पहल गर्न सचिव रौलेले आग्रह गरेका छन् ।
प्राकृतिक रुपमा दोहन हुँदै आएको क्षेत्रहरु रोक्न र यसको व्यवस्थापनमा स्थानीय सरकारले ध्यान दिन जरुरी रहेको कार्यक्रममा सहभागीहरुले बताएका छन् ।
बडीमालिका नगरपालिकाकी उप प्रमुख नन्दा कुमारी थापाको अध्यक्षतामा संचालन भएको कार्यक्रममा जिल्ला समन्वय समिति बाजुराका प्रमुख तुलसीराम रोकाया प्रमुख अतिथी रहेका थिए ।
कार्यक्रममा बडीमालिका नगरपालिकाका पुर्व नगर प्रमुख पदम बडुवाल, नेपाली काँग्रेसका गोपाल कार्की,नेकपा एमालेका हिक्मत थापा अतिथीका रुपमा रहेका थिए ।
बडीमालिका नगरपालिकाका वडाअध्यक्ष,नगर क्षेत्रमा रहेका सामुदायिक वनका अध्यक्ष तथा पदाधिकारीहरु सहभागी थिए ।
प्रकृति संरक्षण कोष नेपालका प्रमुख लक्ष्मी जोशीले सहजीकरण तथा स्वागत मन्तव्य राखेको कार्यक्रमको संचालन कार्यक्रम एसोसियट हरिप्रिया शाहीले गरेकी थिइन् । कार्यक्रममा ७० बढी सहभागी थिए ।