149 पटक पढिएको
बाजुरा– जिल्लाको पुर्वी उत्तरी भेगको हिमाली गाउँपालिका–५ क्युडीका पहिरोबाट पिडित ९९ परिवारलाई शनिबार राहत वितरण गरिएको छ ।
लगातारको आएको अविरल वर्षाका कारण गाउँ भन्दा तल काटिएको सडक भासिएर पहिरो जान थालेपछि सो ठाँउका स्थानियहरु विस्थापित भएका थिए । उक्त गाउँका पहिरोबाट विस्थापित घर परिवारहरुलाई गाउँपालिका र जिल्ला प्रशासन कार्यालय बाजुराले संयुक्त रुपमा राहत वितरण गरेको गाउँपालिकाका रोजगार संयोजक विर्खराज पाण्डेले जानकारी दिए ।
क्युडीका ९९ परिवारका पाँच सय ७१ जनालाई प्रति व्यक्ती ८ केजी चामलका दरले शनिबार राहत वितरण गरिएको गाउँपालिकाका प्रमुख प्रशासकीय अधिकृत राजबहादुर भण्डारीले बताएका छन् ।
वातावरणीय प्रभाव मुल्यांकन बिना डोजर प्रयोग गरेर सडक निर्माण गर्दा हिमाली गाउँपालिकाको क्युडी लगायतको दुई गाउँका स्थानीय पहिरोका कारण विस्थापित बनेका छन् । भने उनीहरु अहिले जंगलमा त्रिपाल टाँगेर बस्न बाध्य भएका छन् ।
गत असार पहिलो हप्ता आएको अविरल वर्षासंगै आएको पहिरोका कारण क्युडीका स्थानीय विस्थापित भएका थिए । उनीहरु अहिले पनि जंगलमा पाल टाँगेर बस्न बाध्य छन् ।
क्युडीमा पहिरोका कारण स्थानीय विस्थापित भैसकेपछि यसअघि पनि हिमाली गाउँपालिकाले खाद्यान्न र त्रिपाल वितरण गरेको थियो ।
फेरी शनिबार जिल्ला प्रशासन कार्यालय बाजुरा र हिमाली गाउँपालिकाको संयूक्त सहयोगमा राहत वितरण गरिएको गाउँपालिकाका अध्यक्ष गोविन्द बहादुर मल्लले बताए ।
उक्त राहत वितरण कार्यक्रममा गाउँपालिकाका अध्यक्ष गोविन्द बहादुर मल्ल, उपाध्यक्ष चन्द्रादेवि बुढा, समन्वय समिति सदस्य दलबिर बुढा, प्रमुख प्रशासकिय अधिकृत राज बहादुर भण्डारी,वडाध्यक्ष अम्मलाल कार्की, रमेश वि.क, बिर बहादुर बुढा, रेडक्रस सोसाइटी बाजुराका सदस्य विर्खराज पाण्डे,रुगिन उपशाखा सभापती जय बहादुर भण्डारी,विछ्या प्रहरी चौकी इञ्चार्ज लगायत हिमाली गाउँपालिकाका कर्मचारीहरुको सहभागिता थिए ।
