304 पटक पढिएको
बाजुरा:- सार्वजनिक स्थलमै जातीय विभेद गर्ने व्यापारी हंश बहादुर विष्टको नाममा प्रहरीमा उजुरी परेको छ । खप्तड छेडेदह गाउँपालिका ६ सुदाडा बस्ने केशे सार्कीले आफूलाई सार्वजनिक स्थलमै जातीय विभेद गरेको व्यहोरा सहीत जिल्ला प्रहरी कार्यालय बाजुरामा उजुरी दिएका हुन् ।
बडिमालिका नगरपालिका ४ तिपाडामा व्यापार गर्दै आएका विष्टले बीच बजारमै गाली बेइज्जती र कुटपीट समेत गरेको केशे सार्कीले बताएका छन् । जातीय विभेद कसुर सजाय ऐन अन्र्तगत सजाय गरिपाउँ भन्दै सार्कीले विष्टका नाममा उजुरी दिएको बताएका छन् ।
आत्म सम्मानमा चोट पुग्ने गरि सार्वजनिक स्थलमै सबैको सामुन्ने डुम, चमार, हैसियत नभएको जस्ता शब्द प्रयोग गरेका उजुरीमा उल्लेख गरिएको छ । मार्तडीबाट घर जाने क्रममा एकाएक आएर शरिरमा झुण्डीएको र जातीय विभेद सहीत गाली बेइज्जती गरेको प्रत्यक्ष दर्शीले समेत बताएका छन् ।
खप्तड छेडेदह गाउँपालिका ६ सुदाडा घर भएका विष्ट र सार्की गाउँले पनि हुन् । १० वर्ष पहिलेदेखि अगल भएर बसेको भाइको उदारो लिएको विषयलाई लिएर गाली, अपमान र कुटपीट गरेको सार्कीले उजुरीमा उल्लेख गरेका छन् ।
जातै नाममा विभेद र अपमान सहेर बस्न नसकिने र विना दोष कुटपीट, गाली दिएको विषय लाई न्यायीक छानवीनका लागि उजुरी दिएको बताएका छन् । विष्ट व्यापार गर्न थालेदेखि आफूहरु माथि दम्भ देखाएर आफूहरु माथि विभेदपूर्ण भाषा बोल्ने र धम्की दिने गरेको गुनासो सार्कीको छ ।
सार्की साउन १९ गते मार्तडीमा नुन, लत्ता कपडा, किन्न र विजुलीको रकम भुत्तानी गर्न भनेर मार्तडी आएका थिए । साउन २० गते घर जाने बेला तिपाडा बजारमा तेरो भाइले पैसा तिर्दैन्, तिमीहरु डुम भनेको औकाद नभएका हौं, तँलाई मार्छु भन्दै गाली सहीत कुटपीट गरेको बुझीएको छ ।
कुटपीट र गाली बेइज्जतीको पछिल्लो दिन आज विहान किन विभेद गर्नु भयो भन्दा उल्टै तँ डुम मलाई केही गर्न सक्दैनस्, उजुरी गर्ने भए गर भनेर झनै गाली गरेको पीडित केशे सार्कीको गुनासो रहेको छ ।
बडीमालिका नगरपालिका ५ का वडा अध्यक्ष बल बहादुर थापा, खप्तड छेडेदह वडा।न ६ बस्ने निर्प सागर बडीबालिका १ पाटाका नन्दे खत्री लगायतले बोलाएर छलफल गर्न खोज्दा फेरी यो ढुम चमारसँग के छलफल गर्नु छ र जाँ गए जा भनेर उल्टै धम्की दिएपछि आफू उजुरी गर्न बाध्य भएको पीडित सार्कीको भनाई छ ।
यता जिल्ला प्रहरी कार्यालय बाजुराका प्रहरी निरीक्षक धनदेव साउँदले निवेदन आएको बताएका छन् । उजुरी आएको छ, दुबै पक्षलाई बुझेर दर्ता प्रक्रिया अघि बढाउने प्रहरी निरीक्षक धनदेव साउँदले बताएका छन् ।
श्रोत- रेडियो बाजुरा👇️ 
