धनगढी: केही दिनदेखि कैलाली र कञ्चनपुरमा कोभिड (१९) को संक्रमण बढ्दै गएको स्वास्थ्य अधिकारीहरुले बताएका छन् ।

केही दिन पहिलेसम्म प्रदेशभर संक्रमणको दर शून्य रहेको १० दिनएता भने कोभिडका विरामी अस्पताल आउनेक्रम बढेको सेती प्रादेशिक अस्पतालका कोभिड विभाग प्रमुख डाक्टर शेरबहादुर कमरले बताए ।‘केही हप्ता अगाडिसम्म आईसियूमा बिरामी थिएनन्। वार्डमा मात्रै एकदुई जना थिए भने एक हप्ता १० दिनएता बिस्तारै बिरामीहरुको संख्या बढ्दै गएको छ उनले भने ।

सोमबार सेती प्रादेशिक अस्पतालमा २३ जना कोभिड संक्रमित उपचाररत छन् । जसमध्ये ४ जनाको आइसियूमा र २ जनाको भेन्टिलेटरमा राखेर उपचार भइरहेको छ । यसै हप्ता अस्पतालमा उपचाररत ३ जना संक्रमितको मृत्यु भएको अस्पतालले जनाएको छ ।यसैगरी कञ्चनपुरको महाकाली प्रादेशिक अस्पतालमा पनि केही दिनदेखि कोभिडका बिरामी आउन थालेको अस्पतालका मेडिकल सुपरिटेन्डेन्ट डाक्टर हरिकुमार श्रेष्ठले बताए । ‘संक्रमित भर्ना हुने क्रम बढ्न थालेको छ । अहिले अस्पतालमा ८ जना भर्ना भएका छन्।’ उनले भने, ‘भाइरल ज्वरोको बिरामी धेरै आइरहेका छन् ।’

सुदूरपश्चिममा स्वाब परीक्षण गर्न आउनेको संख्या समेत बढेको प्रयोगशालाहरुले जनाएका छन्। तर मनसुनको समय भएकोले मौसमका कारण हुने बिरामीहरु जस्तै ज्वरो, टाइफाइट, डेङ्गी, कालाजार, भाइरल ज्वरोसहित कोभिडका बिरामी पनि बढी रहेका चिकित्सकले बताएका छन् ।कोभिड संक्रमणबाट बच्न खोप अभियान समेत सञ्चालन भइरहेको भएपनि भौतिक दुरी कायम राख्न तथा मास्क प्रयोग गर्न अनिवार्य गरिनुपर्ने जनस्वास्थ्यविद्हरुले सुझाव दिँदै आएका छन् ।
दिनेश खबरबाट साभार