धनगढी– बिहीबार विहान भएको वर्षाले धनगढी उपमहानगरपालिकाका अधिकांश क्षेत्र जलमग्न भएका छन् । अविरल वर्षका कारण धनगढीबजार जलमग्न भए पछि अधिकाँश ठाँउहरु डुवानमा पर्न सक्ने सम्भावना भएको छ । सुदूरपश्चिम प्रदेशको अस्थायी मुकाम समेत रहेको धनगढीका मुख्य सडक नै जलमग्न हुँदा आवतजावतमा समस्या भएको छ भने विभिन्न बस्तीमा पानी वसेको छ ।

धनगढीमा सबैभन्दा बढी एलएनचोक, शिवनगर, पार्कचोक, विशालनगर, मिलनचोक, चौराह, उत्तरबेहरीलगायतका अधिकांश क्षेत्र जलमग्न भएका हुन्। यस्तै वडा नं १, ३, ४ लगायतका वडामा केही घर तथा पसलमा पानी पसेको छ ।

जिल्ला प्रहरी कार्यालय कैलालीका प्रहरी नायब उपरीक्षक प्रतिक बिष्टले विभिन्न क्षेत्र जलमग्न भएको बताए । उनका अनुसार जिल्ला प्रहरी कार्यालयको परिसर पनि जलमग्न भएको छ। वर्षाले स्थानीयवासीका धानबाली डुबानमा परेका छन् भने खेतबारी जलमग्न भई तलाउजस्तै देखिएका छन् ।

पानी निकास हुने गरेका पुराना खोलानाला अतिक्रमण गरि भौतिक संरचना निर्माण भएपछि अस्थायी मुकाम जलमग्न भएको हो। धनगढी मुख्य कैलाली नाला, सुकुटी नाला, सबैभन्दा अतिक्रमणमा परेका क्षेत्र हुन् ।

आजको दिनेश खबरबाट साभार