133 पटक पढिएको
धनगढी–डडेल्धुराका दिनेश खडायत शनिबार बिहान धनगढीको बोराडाँडीमा रहेको त्रिभुवन मावि बाहिर थिए । जीपको सवारी चालक अनुमति पत्र (लाइसेन्स) को लिखित परीक्षा दिन धनगढी पुगेका थिए । बिहान साढे ७ बजे विद्यालय पुगेका उनले १० बजेसम्म परीक्षा दिएका थिएनन ्।
तीन घण्टासम्म पनि परीक्षा दिन नपाएपछि खडायत डडेल्धुरामा स्थापना गरिएको यातायात सेवा कार्यालय र ट्रायल सेन्टर सम्झन्छन्। उनले भने, ‘डडेल्धुरामा ट्रायल सेन्टर निर्माण भएको छ। तर प्रयोग भएको छैन। डडेल्धुरामा परीक्षा दिन पाएको भए यस्तो दु:ख पाउने थिएन्। पैसा पनि खर्च भयो, दु:ख पनि ।’
यातायात व्यवस्था कार्यालय धनगढीले शनिबार तीन हजार ५ सय ५० मोटरसाइकल, नाँै सय ३८ जीप तथा कार र एक सय अटोरिक्साको सवारी चालक अनुमति पत्रको लिखित परीक्षा लिएको छ। परीक्षा केन्द्रमा मात्रै होइन धनगढी–अत्तरिया ६ लेन सडक नै जाम हुने भिड थियो।
डोटीको जोरायल गाउँपालिका वडा नम्बर ६ का निराजन साउँदले भिडभाडले हैरान भएको बताए। उनले डोटीबाट धनगढी आउन सडकका कारण बाटोमा समस्या भएको र धनगढीमा भिडका कारण परीक्षा दिन झनै सास्ती भएको बताए। उनले भने, ‘डोटीबाट परिक्षा दिन अरु पनि आएका छन्। दीपायलमा यातायात सेवा कार्यालय र ट्रायल सेन्टर छ। तर कार्यालय सुनसान छ। ट्रायल सेन्टर पनि प्रयोगमा आएको छैन। धनगढीको कार्यालयले काम गर्न सक्ने अवस्था छैन।’
सुदूरपश्चिम प्रदेशमा सवारी चालक अनुमति पत्र (लाइसेन्स)को परिक्षा दिन जहिलै सास्ती हुँदै आएको हो। सेवाग्राहीको संख्या धेरै भएकाले समस्या हुँदै आएको यातायात कार्यालयको तर्क छ। तर पहाडी दुई जिल्लामा रहेका सेवा कार्यालयहरु भने कामविहीन छन्।
सुदूरपश्चिमको भौतिक पूर्वाधार विकास मन्त्रालय मातहतका सेवा कार्यालयमा ट्रायल सेन्टरसमेत रहेकोमा प्रयोग हुन नसकेको हो। भौतिक पूर्वाधार विकास मन्त्रालयका प्रवक्ता प्रेमदत्त भट्टले डोटीको ट्रायल सेन्टर सञ्चालन गर्ने बताए।
उनले भने, ‘डोटी र डडेल्धुरामा ट्रायल सेन्टर निर्माण भएका छन्। डोटीको सञ्चालन गर्ने भनिएको छ। अहिले सञ्चालनमा छैन। अब सञ्चालन गर्छौ।’ धनगढी र महेन्द्रनगरका यातायात कार्यालयहरुमा सेवाग्राहीको संख्या धेरै हुने भएकाले सेवाग्राहीहरुले सास्ती भोग्नु परेको छ। त्यसैमा महिनौँपछि लाइसेन्सको परीक्षा हुँदा झन बढी सास्ती छ ।
दिनेश खबरबाट साभार
