391 पटक पढिएको
बैतडी– बैतडीको पञ्चेश्वर गाउँपालिका वडा नम्बर ६ गणमेश्ररमा मंगलबार दिउँसो जिप दुर्घटना हुँदा ४ जनाको मृत्यु भएको छ भने ६ जना घाइते भएका छन् । से १ ज १८३ नम्बरको जिप दुर्घटनामा परेको हो । दुर्घटनामा परेर मृत्यु हुनेमा अन्दाजी ५० वर्षीय जीतसिंह भण्डारी, अन्दाजी ३० वर्षिया डम्मरसिंह भण्डारी, अन्दाजी २७ वर्षीय हिक्मत भण्डारी र अन्दाजी ४० वर्षीय दीपक भण्डारी रहेको बैतडी प्रहरीले जनाएको छ ।
मृतकहरु सबै वडा नम्बर–६ गणमेश्रर कै स्थानिय रहेको र घटना स्थलमै रहेका जिल्ला प्रहरी कार्यालयका प्रवत्ता प्रहरी निरीक्षक दर्शन खड्काले जानकारी दिए । उनका अनुसार घाइते ६ जनालाई उपचारको लागि जिल्ला अस्पताल बैतडीमा ल्याइएको छ ।
शव पोष्ट मार्टमको लागि जिल्ला अस्पताल ल्याउँदै गरेको जिप दुर्घटनामा परेको हो । घाइतेलाई हतारमा अस्पताल पठाइएकोले अवस्था बारे अहिले भन्न नसकिने खड्काले बताए । जिपमा १० जना यात्रु सवार रहेका थिए । प्रहरीका अनुसार घटनाको कारण खुल्न भने सकेको छैन । यो समाचार आजको कान्तिपुर दैनिकमा छापिएको छ ।
