काठमाडौँ–बूढानीलकण्ठ नगरपालिका–४ स्थित एक घरमा आगलागी हुँदै रु १५ लाख बराबरको धनमाल जलेर नष्ट भएको छ ।

स्थानीय पासिकोट शिवमन्दिर नजिक बस्ने ४३ वर्षीय दिलसेन खड्काको घरमा ग्याँस सिलिन्डर पड्किएर गए राति आगलागी जनकारी प्राप्त भएको छ । प्रहरी प्रधान कार्यालयले दिएको जानकारी अनुसार आज सङ्कलित प्रारम्भिक विवरणमा आगलागी हुँदा अन्नपात, लत्ताकपडा, भाँडावर्तन र नगद रु एक लाख ५० हजारसहित १५ लाख बराबरको धनमाल जलेर नष्ट भएको बताइएको छ ।

यसैबीच काठमाडौँको टोखा नगरपालिका–३ रमाइलो डाँडा बस्ने कुमार शाहको घरबाट एक थान टेलिभिजन र सुनका विभिन्न गहनासमेत गरी करिब चार लाख ८१ हजार बराबरको धनमाल चोरी भएको छ । चोरीमा संलग्न व्यक्ति फरार रहेकाले खोजी जारी रहेको प्रहरीले बताएको छ ।

यता काठमाडौँ महानगरपालिका–१३ टङ्केश्वर डेरा गरी बस्ने रौतहट राजदेवी नगरपालिका–३ का ४२ वर्षीय रामप्रसाद श्रीवास्तवको कोठाबाट करिब तीन लाख ३७ हजार बराबरको सुन तथा चाँदीका गहना चोरी भएको प्रहरीले जनाएको छ ।

यसैबीच महिलालाई जबर्जस्ती करणी गरेको अभियोगमा काठमाडौँ–१५ डल्लु बस्ने कालिकोट तिलगुफा नगरपालिका–११ का ३१ वर्षीय नारायण शाहीलाई प्रहरीले पक्राउ गरेको छ। उक्त घटनामा अनुसन्धान भइरहेको प्रहरीको भनाइ रहेको छ ।

दिनेश खबरबाट साभार