काठमाडौं–काठमाडौं, रामेछाप र मकवानपुरमा भएका सवारी दुर्घटनामा ४ जनाको मृत्यु भएको छ । काठमाडौं महानगरपालिका–१४ कलंकी खसी बजारमा प्र.३–०१–००५ ख ९३०० नम्बरको बसले प्र.३–०२–०१४ प ७४६३ नम्बरको स्कुटरलाई मंगलबार दिउँसो ठक्कर दिँदा स्कुटरमा सवार २ जनाको मृत्यु भएको हो । मृत्यु हुनेहरुमा स्कुटर चालक ३५ वर्षीय राम बहादुर आचार्य र स्कुटरमा सवार ललितपुर इमाडोल बस्ने ५२ वर्षीय यादव कुँवर रहेका छन् । ठक्करबाट गम्भीर घाइते भएका उनीहरुको बयोधा अस्पताल बल्खुमा उपचारको क्रममा मृत्यु भएको बताइएको छ ।

यस्तै रामेछापको लिखुतामाकोशी गाउँपालिका–१ बसेरीमा ना.६ त ७२८४ नम्बरको ट्याक्टर मंगलबार साँझ सडकबाट करिब ५५ मिटर तल खस्दा ट्याक्टरमा सवार सोही ठाउँ बस्ने ५४ वर्षीय उद्धव राज पौडेलको मृत्यु भएको छ ।दुर्घटनामा घाइते भएका ट्याक्टरमा सवार अन्य २ जनालाई उपचारको लागि जिल्ला अस्पताल पठाइएको छ । ट्याक्टर चालकलाई प्रहरीले नियन्त्रणमा लिएको छ ।

उता मकवानपुरको हेटौंडा उपमहानगरपालिका–९ हनुमानगेट नजिक सडकमा ना.३ च ११९३ नम्बरको गाडीले ना.३४ प ६०४४ नम्बरको मोटरसाइकललाई मंगलबार राति ठक्कर दिँदा मोटरसाइकल चालक हाल पहिचान नखुलेका करिब ३५ वर्षीय पुरुषको मृत्यु भएको छ ।
दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो। गाडी चालकलाई प्रहरीले नियन्त्रणमा लिएको छ ।
श्रोत दिनेश खबर