413 पटक पढिएको
बाजुरा – जिल्लाको बडीमालिका नगरपालिका–८ को बीच बजारमा रहेको नेपाल खाद्य व्यवस्था तथा व्यापार कम्पनीको जग्गामा निर्माण गरिएका टहरा हटाउन पटक- पटक ताकेता गर्दा पनि व्यापारीहरुले अटेर गर्दै आएको पाइएकाे छ । कम्पनी र बडीमालिका नगरपालिका बीच भाडामा लिने गरी भएको सम्झौता अनुसार नगरपालिकाले व्यापारीलाई उत्तः जग्गा खाली गर्न तीन महिना देखि पत्र पठाउने गरेको भएपनि व्यापारीहरुले टहरा हटाउन व्यवास्ता गरेको बडीमालिका नगरपालिकाले जनाएको छ ।
नगरपालिका भरिका कृषकले उत्पादन गरेका अन्न तथा तरकारी बाली राख्नका लागि कोल्ड स्टोर निर्माण गर्नका लागि कम्पनीसंग गरेको सम्झौता अनुसार पटक पटक व्यापारीलाई टहरा हटाउन पत्र पठाउदा समेत कुनै चासो नदेखाएको नगरपालिकाका निमित्त प्रमुख प्रशासकीय अधिकृत रंगमल वि.क.ले बताएका छन् ।
उहाँका अनुसार नगरपालिका कार्यपालिकाको बैठकबाट टहरा हटाउनका लागि टहरा बनाएका व्यापारीहरुलाई पत्र पठाउदा समेत पत्र नै नबुझ्ने गरेको बताइएकाे छ। उनका कोल्ड स्टोर निर्माणका लागि टहरा हटाउन पत्र दिएपनि नबुझ्नेमा गगन ऐडी,कृष्णनाथ योगी,लक्ष्मी थापा र प्रकाश थापा रहेको निमित्त प्रशासकीय अधिकृत वि.क.ले जानकारी दिए ।
कृषकका लागि कोल्ड स्टोर निर्माण गर्न कृषि विकास निर्देशनालयले करिव ४४ लाखको ठेका गरी ठेका समेत एस एच कन्ट्रक्सनले कुँवरले लिइ सकेको छ । ठेका आह्वान भएर पनि गएको जेठमा कोल्ड निर्माण लागि कृषि विकास निर्देशनालय र एसएच कन्ट्रक्सन बीच सम्झौता पनि भइसकेको छ । ठेका सम्झौता भएको लामो समय भइसक्दा पनि ठेकेदारले काम नगरेको नगरपालिकाले जनाएको छ । नगरपालिकाले कम्पनीसंग भएको सम्झौता अनुसार जग्गाको भाडा तिर्दै आएको छ ।
यता एस एच कन्ट्रक्सनका ठेकेदार हस्तबहादुर कुँवरले नगरपालिकालाई पटक÷पटक ठाउँ खाली गराइ दिन पत्र लेखेको भएपनि हाल सम्म कोल्ड स्टोर निर्माण गर्न ठाउँ नभएकाले निर्माण कार्यमा ढिलाई भएको बताए । ठेका सम्झौता भएको दश महिना वित्न लाग्दा समेत नगरपालिकाले ठाउँ उपलव्ध नगराएकाले निर्माणको कार्य अघि बढाउन नसकेको उनले बताएका छन् । कोल्ड स्टोर निर्माणका लागि जग्गा नै खाली नभएपछि सम्झौता अनुसार काम नभएकाले त्यसको क्षतीपुर्ति समेत नगरपालिकाले दिनुपर्ने उनकाे भनाइ छ ।
