297 पटक पढिएको
बाजुरा– भौलोकि विकटता र सुविधासम्पन्न अस्तालको अभावमा हरेक वर्ष कति सुत्केरी र गर्भवती महिलाको मृत्यु हुन्छ भन्ने एकीन तथ्याङ्क सरकारसँग पनि छैन् ।
यद्यपी यस्तो अवस्था आउन नदिन भन्दै सञ्चालन गरिएको जोखिममा परेका गर्भवती तथा सुत्केरी महिलाहरूको निः शुल्क हवाइ उद्धार सेवा कार्यक्रम प्रभावकारी भएको छ । यो कार्यक्रमले जोखिम त टारेको छ नै आमा र नवजात शिशुको स्वास्थ्य स्याहार र पोषण कार्यक्रममा पनि सहयोग पुगेको छ ।
समयमै सुविधा सम्पन्न ठाउँमा लगेर राख्न न्यून आर्थिक अवस्थाले पुग्दैन, चिकित्सक वा स्वास्थ्यकर्मीले बच्चा जन्मिने दिएको भाका कुर्दा भैपरी आउने घटनाको डरले मन पोलिरहन्छ । दुर्गम क्षेत्रमा बसोबास गर्ने जोकोहीको मनमा आउने यस्तो विचार र चिन्ताबाट बाजुराबासी पनि अलग छैनन् ।
बाजुरा सहित सुदूरपश्चिमका अछाम र दार्चुलामा जोखिममा परेका गर्भवती तथा सुत्केरी महिलाहरूको निः शुल्क हवाइ उद्धार कार्यक्रम पूर्ण कार्यान्वयनमा छन् । बाजुरामा भरपर्दो सडक छैन, अस्पताल छ । तर, गुणस्तरीय सुविधा पुगिसकेको छैन । त्यसैले निः शुल्क हवाई उद्धार कार्यक्रमले भरोसा जगाएको स्थानीयको भनाइ छ ।
बाजुरामा हालसम्म सामान्य अवस्थाबाट सुत्केरी हुन नसकेका २० जना महिलाले सरकारको निःशुल्क हवाई उद्धार सेवा पाएका छन् । यसबाट आमा र बच्चाको जीवन जोगाउन सजिलो भएको सहायक प्रमुख जिल्ला अधिकारी लोकेन्द्र बहादुर बिष्टले बताए । प्रदेश १ को ताप्लेजुङ, सङ्खुवासभा, भोजपुर, खोटाङ, सोलुखुम्बु, ओखलढुङ्गा, मनाङ, मुस्ताङ, कर्णालीको रुकुमपूर्व, रुकुम पश्चिम, जाजरकोट, डोल्पा, कालिकोट, मुगु र हुम्लामा पनि यो कार्यक्रम पूर्ण कार्यान्वयनमा छ ।
आर्थिक वर्ष २०७५÷७६ देखि सुरु भएको हवाइ उद्धार सेवा पाउने महिलालेसुत्केरी पोषण स्याहार तथा यातायात सहयोगका लागि एकमुष्ट बीस हजार रुपैयाँसमेत पाउने गरेका छन् । आंशिक रूपमा भने यो कार्यक्रम विभिन्न २९ जिल्लामा लागु भएको छ ।
