95 पटक पढिएको
सन्जिता धामी/बझाङ्ग: जिल्लाको केदारस्युँ गाउँपालिका–७ भामचौरमा सचेतनामूलक कार्यक्रम सञ्चालन गरिएको छ । शुक्रबार केदारस्युँ गाउँपालिकाको आर्थिक सहयोग र जनचेतना सञ्चार समूहको आयोजनामा बालविवाह, बहुविवाह र छाउपडी प्रथा न्यूनीकरणसम्बन्धी सचेतनामूलक कार्यक्रम सञ्चालन गरिएको हो । सञ्चारकर्मी कर्ण धामीको संयोजकत्वमा सञ्चालन गरिएको कार्यक्रममा केदारस्युँ गाउँपालिकाकी उपाध्यक्ष निशा धामी प्रमुख अतिथि रहेकी थिइन् । कार्यक्रममा उपाध्यक्ष धामीले राम्रो काम गर्नेलाई सधैँ आफ्नो साथसहयोग रहने प्रतिबद्धता जनाइन् । ‘कार्यक्रम मलाई राम्रो लाग्यो ।
यस्तो संकटमा सचेतनामूलक सडक नाटकबाट प्रत्यक्ष रूपमा हेर्दा नबुझ्नेहरूले पनि धेरै कुरा बुझ्छन् । राम्रो काम गर्नेलाई हाम्रो सधैं साथसहयोग रहन्छ,’ उनले भनिन् । त्यस्तै, केदारस्युँ–६ त्याडी गाउँकी जानकी बोहराले यस्ता जनचेतानामूलक कार्यक्रमले गाउँमा सकारात्मक प्रभाव पार्नमा राम्रो भूमिका खेल्ने बताइन् । त्यस्तै, अर्का सहभागी हर्का धामीले कार्यक्रममार्फत जानकारी गराएका कुरा व्यवहारमा लागू गर्न सकिए समाज परिवर्तनमा टेवा पुग्ने विश्वास व्यक्त गरिन् । बालविवाह, बहुविवाह र छाउपडी प्रथा जस्ता समाजमा रहेका कुरिती र कुसंस्कारलाई न्यूनीकरण गर्दै समाजमा जनचेतना फैलाउनु कार्यक्रमको उद्देश्य रहेको कार्यक्रम संयोजक धामीले बताए ।
‘सामाजिक कार्यको लागि आफूँ सधैं अघि सर्छु, समाजमा रहेका कुरिती कुसंस्कार, कुप्रथा जस्ता जघन्य अपराधविरुद्ध लडिरहन्छु, सकारात्मक परिवर्तन ल्याउनको लागि सबैको हातेमालो हुनुपर्छ । शान्ति न्याय र सक्षम निकायहरू लगायतका दिगो विकासका लक्ष्य पूरा गर्नको लागि ठूलो टेवा पुग्छ,’ उनले भने । कार्यक्रम अझै केही दिन जारी रहने संयोजक धामीले बताए । उनका अनुसार जिल्लाका अन्य स्थानमा गएर पनि जनचेतना सम्बन्धी कार्यक्रम सञ्चालन गरिने छन् ।
प्रतिक्रिया
सम्बन्धित खवर
