295 पटक पढिएको
काठमाडौंः राष्ट्रिय प्रजातन्त्र पार्टी (राप्रपा)ले पार्टी परित्याग गर्ने निर्णयमा पुनर्विचार गर्न पूर्वअध्यक्ष कमल थापालाई अनुरोध गरेको छ । राप्रपा पदाधिकारीको मंगलबार अपराह्न बसेको आकस्मिक बैठकले एकता महाधिवेशनपछि राप्रपाको लोकप्रियतामा वृद्धि तथा राष्ट्रिय शक्तिका रूपमा उदय र विकास भइरहेको समयमा थापाबाट अनपेक्षित तथा अप्रत्यासित रूपमा व्यक्तिगत तवरले पार्टीबाट अलग हुने घोषणाप्रति दुःख प्रकट गर्दै पुनर्विचार गर्न अनुरोध गरेको हो ।
पार्टी स्थापनाको उद्देश्य तथा हालै सम्पन्न महाधिवेशनले तय गरेको राजसंस्था र हिन्दुराष्ट्रको पुनःस्थापना लगायतका सैद्धान्तिक अवधारणा र कार्यदिशामा अविचलित रहेको निष्कर्ष निकाल्दै बैठकले यो घटनाबाट दुविधामा नपर्न र विचलित नहुन नेता, कार्यकर्ता तथा शुभेच्छुकलाई आग्रह गरेको छ । साथै आसन्न स्थानीय तहको निर्वाचनको तयारीमा जुट्न पार्टीका सबै तहलाई आह्वान गरेको प्रवक्ता मोहन श्रेष्ठले जानकारी दिए ।
अन्नपुर्ण पोष्टबाट साभार
