298 पटक पढिएको
धनगढी। कैलालीको धनगढी मेनरोडस्थित सारथी अस्पतालमा भीषण आगलागी भएको छ । अहिले आगो नियन्त्रण लिइसकिएको अवस्था छ ।धनगढी उपमहानगर १ स्थित उक्त अस्पतालमा गएराति झन्डै १ बजेतिर आगलागी भएको हो । १५ शैया र ४ आईसीयू रहेको अस्पतालमा १ जना बिरामी भर्ना भएका थिए । आगलागीबाट मानवीय क्षति नभए पनि उपकरणसहित भौतिक सामग्रीहरू जलेर नष्ट भएका छन् ।
अस्पतालमा आगो लागेको खबर पाएसँगै नियन्त्रणका लागि नेपाल प्रहरी र धनगढी महानगरप्रहरी खटिएका थिए । अस्पतालमा रहेका बिरामीलाई नजिकै रहेको सेती प्राविधिक अस्पतालमा सारिएको छ ।आगलागीबाट भएको क्षतिको यकिन विवरण आई नसकेको भएपनि त्यहाँ रहेका एक्सरे मेसिन, यूएसजी, ईको र फर्निचरहरू सबै जलेको अस्पतालका प्रबन्ध निर्देशक वेदप्रकाश जोशीले जानकारी दिए । उनका अनुसार बचेका केही सामग्री आगो नियन्त्रणमा खटिएका सुरक्षाकर्मीहरूले बाहिर सारेर जोगाएका छन् ।
आगो विद्युत् सट भएर लगेको हुन सक्ने अनुमान गरिएको छ । खाद्य व्यवस्था तथा व्यापार कम्पनीको गोदाम भाडामा लिएर अस्पताल सञ्चालन गरिएको थियो । अपताल नजिकैका केही व्यापारिक गोदामहरूमा पनि आगलागीबाट क्षति भएको प्रहरीले जनाएको छ ।
