धनगढी–कैलालीको त्रिनगर भन्सार नाकाबाट पेट्रोलियम पदार्थको आयात घटेको छ।
सो नाका भएर गत आर्थिक वर्षको ६ महिनामा एक अर्ब ४८ करोड ९१ लाख ३१ हजारको डिजेल आयात भएको थियो। तर चालु आर्थिक वर्षको ६ महिनामा भने डिजेलको आयात घटेको छ। गत वर्षको सोहि अवधिमा ३४ हजार २० केल डिजेल भारतबाट आयात गरिएको हो। तर, चालु आर्थिक वर्षको ६ महिनामा ३३ हजार ६ सय २८ केल मात्र आयात भएको छ।
सो नाका भएर एक अर्ब ४० करोड तीन लाख ४९ हजारको डिजेल आयात भएको भन्सार कार्यालयको तथ्यांक छ। त्यस्तै पेट्रोल आयातमा पनि कमि आएको छ। गत वर्षको ६ महिनामा १३ हजार एक सय ७६ केल पेट्रोल आयात भएकोमा चालु आर्थिक वर्षको सोहि अवधिमा घटेर ७५ करोड ५१ लाख ७७ हजारमा सिमित बन्न पुगेको छ। चालु आर्थिक वर्षको ६ महिनामा ७६ करोड ५६ लाख ७४ हजार मुल्यको पेट्रोल आयात भएको छ।
कैलाली भन्सार नाकाबाट सबैभन्दा बढी पेट्रोलियम पदार्थ आयात हुँदै आएको छ। तर चालु आर्थिक वर्ष सुरु भएसँगै आयातमा केहि कमि आएको भन्सार कार्यालयले जनाएको छ। चालु आर्थिक वर्षको ६ महिनामा १३ करोड ६९ लाख ८ हजार मूल्यको ग्याँस आयात भएको छ। भारतबाट आयात हुने ग्याँसको मात्रा भने केही बढेको छ।

गत वर्षको ६ महिनामा ७३ लाख ७८ हजार नौ सय ६० किलोग्राम ग्याँस आयात भएकोमा चालु आर्थिक वर्षको सोहि अवधिमा ७७ लाख ३३ हजार पाँच सय ४० किलोग्राम आयात भएको छ। गत आर्थिक वर्षको ६ महिनामा १४ करोड ७९ लाख १२ हजार २ सय ४९ मुल्यको दालमोट, पापड, भुजिया आयात भएको थियो।

चालु आर्थिक वर्षको सोहि अवधिमा बढेर १७ करोड १७ लाख २४ हजार पाँच सय ९४ मुल्यको दालमोट लगायतका सामाग्री आयात भएको छ। चालु आर्थिक वर्षको ६ महिनामा ८ करोड चार लाख ५२ हजारको सेरामिक, ११ करोड ४७ लाख ९१ हजारको पेपर तथा पाँच करोड ७४ लाखको बिल्याङ्केट आयात भएको भन्सार कार्यालयको तथ्यांक छ। गत आर्थिक वर्षको ६ महिनाको तुलनामा चालु आर्थिक वर्षको सोहि अवधिसम्म ११ करोड ३४ लाख ३२ हजारले आयातमा कमि आएको छ।