धनगढी: आइतबार दिउँसो २ बजे कञ्चनपुरको त्रिनगर–गौरीफन्टा नाकामा भारत प्रवेश हुनेको निकैनै लर्को लागेको छ । कैलालीको मोहना नदीे पुल देखि भारतको दशगजा क्षेत्र सम्म सिमा पार गर्ने नेपालीहरुको यतिखेर निकै नै लस्कर लागि रहेको छ । भारत तिर जानेहरुमा अधिकाँश महिला बालबालिका देखि कलिलो उमेर समूहका युवाहरु सँगै वयस्क पुरुषहरु पनि रहेका छन ।

कोरोनाको प्रभाव कम भएसँगै नेपालमा बेरोजगारी भएकोले आफुहरुले बर्षेनी रोजगारीका लागी भारत नै जाँनु पर्ने डोटीका एक स्थानिय लाल बहादुर थापाले बताए । गाउँघरमा काम गरी खाने बाटो नभएकोले ‘कोरोनाको कारण घर खर्च चलाउन पनि समस्या भएको उनले बताए । लाल बहादुर संगै गाउँका १७ जना पनि आइतबार नै भारत पसेका छन् ।

कैलालीको जानकी गाउँपालिका वडा नम्बर २ का रेवन्त साउद भारतमा कोरोना संक्रमणको दर बढ्न थालेपछि गत चैतमा घर फर्किएका थिए । स्वदेश मै केही गर्ने योजना सहित नेपाल फर्किएका साउद वैशाख देखि लागु भएको लकडाउनका कारण घर भित्रै बसे ।

लकडाउनका कारण घर खर्च चलाउन समेत मुस्किल हुन थालेपछि पुन: भारत जानुपर्ने बाध्यता आइलागेको दु:खेसो उनको छ। ‘यताको सरकारले केही गर्ला जस्तो छैन्,’ उनले भने, ‘हामी विगतमा पनि भारतमै जान्थ्यौ, आज पनि जानुपर्ने बाध्यता छ।’ यतिबेला कञ्चनपुरको गड्डाचौकी नाका भएर पनि सयौं प्रदेशवासीहरु भारत गइरहेका छन् । कति पय धान नेपालीहरु रोपाईको काम सकेर घर खर्च चलाउन आफ्नो देश छोडेर भारत पस्दै छन ।

शुदुरपश्चिम प्रदेशका दुई नाका भएर मात्रै दैनिक १ हजार भन्दा बढी नेपाली भारत गइरहेका छन् । भारत जानेहरु मध्ये अधिकांश कामको लागि गइरहेको जिल्ला प्रहरी कार्यालय कञ्चनपुरका निमित्त प्रवक्ता लालबहादुर बमले बताए । स्थानीय स्तरमा रोजगारी सिर्जना गर्न तीनै तहका सरकार भने असफल भएका छन्। प्रदेशवासीको स्वदेशमै रोजगारी गर्ने सपना पुरा गर्नका लागि नीति–निर्माण गर्ने क्षेत्रमा पुगेकाहरुले चासो नदिएको गुनासो उनीहरुको छ।

सुदूरपश्चिम प्रदेशका मुख्यमन्त्री त्रिलोचन भट्ट आफु मुख्यमन्त्रीमा नियुक्त भएकै बेला कामका लागि प्रदेशवासीले भारत जानुपर्ने बाध्यताको अन्त्य हुने घोषणा गरेका थिए गरेता पनि उनको कार्यकालको तीन वर्ष पुरा भै सक्दा पनि स्वदेशमा रोजगारीका अवसरहरु सिर्जना गर्नतर्फ प्रदेश सरकारको ध्यान भने जान सकेको छैन ।