बाजुरा: जिल्लाको मुख्य राजमार्ग मानिने साँफे–मार्तडी सडकखण्ड दुई साता अघि देखि अवरुद्ध बनेको छ । गत हप्ता आएको अविरल वर्षाका कारण साँफे–मार्तडी सडकखण्डको बार्जुगाड, सेरा, बल्दे , अम्कोट लगायतका विभिन्न ठाउँमा पहिरो खसेपछि साँफे–मार्तडी सडकखण्ड अवरुद्ध बनेको हो । हरेक वर्ष वर्षायाममा अवरुद्ध हुँदै आएको साँफे–मार्तडी सडकखण्ड यसपालि भने गत जेठ महिनाबाटै पटक–पटक अवरुद्ध हुँदै आएको छ । गत जेठमा अविरल वर्षाका कारण साँफे–मार्तडी सडकखण्ड अन्तरगत पर्ने रिलामा बाढी पहिरो आँउदा सडक अवरुद्ध हुनुका साथै स्थानियका होटेल पसलमा समेत क्षती पुर्याएको थियो भने बुढीगंगा नगरपालिका अन्तरगत पर्ने ताप्रेसेरा खोलामा आएको बाढीेले सडक अवरुद्ध पार्नुका साथै सेरा बगरमा स्थानियले लगाएको गहुँबाली पनि नष्ट पारेको थियो ।

जेठ महिनामा वर्षासंगैको बाढीका कारण अवरुद्ध बनेको सडक सडक डिभिजन कार्यालय अछामले स्काभेटर प्रयोग गरी सडक संचालनमा ल्याएको थियो । पुन: असार पहिलो हप्ताबाट लगातार सुरु भएको बर्षाका कारण साँफे–मार्तडी सडकखण्ड पुर्ण रुपमा अवरुद्ध बनेको थियो । सो सडक अवरुद्ध बनेको दुईसाता बढी बितिसक्दा पनि संचालनमा आउन सकेको छैन । सदरमुकाम मार्तडीबाट तिपाडासम्म विभिन्न ठाउँमा आएको पहिरो पन्छाएर सडक संचालनमा आएपनि तिपाडादेखि बेतालमाण्डौँसम्मको सडक भने पुर्ण रुपले अवरुद्ध बनेको छ । तिपाडादेखि तल बल्दे,अम्कोट, ताप्रेसेरा लगायतका विभिन्न ठाउँमा पहिरो आएका कारण सडक अवरुद्ध बनेको हो ।

अवरुद्ध सडक खोल्नका लागि सडक डिभिजन कार्यालय अछामले स्काभेटर प्रयोग गरेर बेलातमाण्डौँ,बार्जुगाड, तापे्रेसेरा लगायतका ठाउँहरुमा सडक मर्मत गरिरसकेको र अहिले बल्दे नजिकै अम्कोटबाट साँफे–मार्तडी सडकखण्डमा खसेको पहिरो पन्छाउँदै गरेको र सडकमा खसेको ठुलो ढुंगाका कारण मर्मतमा ढिलाई भएको जिल्ला प्रहरी कार्यालय बाजुराले जनाएको छ । अबको एक/दुई दिनमा स्काभेटरले बल्देको पहिरो पन्छाएपछि सडक पुर्ण रुपमा संचालनमा आउने जिल्ला प्रहरी कार्यालय बाजुराका सुचना अधिकारी धनदेव साँउदले जनाकारी दिए ।