109 पटक पढिएको
धनगढी : भीमदत्त राजमार्ग अन्तर्गत डडेल्धुराको गैरादेखि भात्काडासम्म सडक डिभिजन कार्यालय डोटीले राजमार्ग स्तरोन्नती तथा पुन:स्थापना कार्यक्रम मार्फत मोड सुधारका लागि गत वर्ष दुईवटा ठेक्का गर्याे । एक करोड ५० लाखमा मोड सुधारका लागि ठेक्का सम्झौता गरिएको थियो।
तर ७ पहाडी जिल्लाको आवागमन नै अवरुद्ध हुने गरी मोड सुधारको काम भइरहेको स्थान अर्थात आलीताल गाउँपालिका वडा नम्वर १ कटाल गैरास्थित सडक खण्डमा पटकपटक पहिरो जान थालेको छ । चालू आर्थिक वर्षभित्रै मोड सुधारअन्तर्गत ठेक्का सम्झौता भएका स्थानमा सडक फराकिलो बनाउने काम सपन्न हुने सडक डिभिजन कार्यालय डोटीका इन्जिनियर योगेन्द्र अधिकारीले बताए ।
‘राजमार्ग स्तरोन्नती तथा पुन:स्थापना कार्यक्रमअन्तर्गत मोड सुधार गर्न गत आर्थिक वर्षमा दुई वटा ठेक्का सम्झौता गरिएको हो,’ इन्जिनियर अधिकारीले भने । सडकको मोडलाई फराकिलो बनाएर दुर्घटना न्यूनिकरण गर्न यस्ता कार्यक्रम देशभरीकै राजमार्गहरुमा सञ्चालन भइरहेको उनले बताए । सडक डिभिजन कार्यालय महेन्द्रनगर कञ्चनपुरले महाकाली हाइवेअन्तर्गत अत्तरियादेखि फल्टुडेसम्मको सडक हेर्दै आएको छ। राजमार्गका अधिकांश स्थानमा सडक भत्किनुका साथै ठाउँठाउँमा चिरा परेको सवारी चालकहरुको गुनासो छ ।
महाकाली हाइवेअन्तर्गत मोड सुधारका कुनै कार्यक्रम नभएपनि ठाउँठाउँमा भत्किएको सडकका कारण दुर्घटनाको जोखिम भन्ने उच्च छ । सडक डिभिजन कार्यालय महेन्द्रनगरका सूचना अधिकारी एवं इन्जिनियर लक्ष्मणदत्त जोशीले आफ्नो कार्यक्षेत्रभित्रको सडक मर्मत तथा पुन:स्थापनाका लागि नियमित रुपमा काम भइरहेको बताए ।
‘अत्तरियादेखि फल्टुडेसम्म मोड सुधारका लागि हामीसँग कुनै कार्यक्रम छैन। यो खण्डभित्र सडक खवरुद्ध हुने अहिलेका लागि कुनै संभावना छैन, ’ उनले भने । अत्तरियादेखि फल्टुडेसम्म सडक डिभिजन कार्यालय महेन्द्रनगरले हेर्दै आएको छ भने फल्टुडेदेखि डडेल्धुरासम्म सडक डिभिजन कार्यालय डोटीले हेर्दै आएको छ ।
गैरादेखि भात्काडा हुँदै साहुँखर्कसम्म मोड सुधारअन्तर्गत सडकका मोडहरु फराकिलो बनाई दुर्घटना न्युनिकरण गर्ने उद्देश्यले ठेक्का सम्झौता गरिएको भएपनि सम्झौताअनुसार निर्माणले अपेक्षित गति लिन सकेको छैन् । तर सडक डिभिजन कार्यालय डोटीले भने सडकको मोड सुधार कार्यक्रम यो अन्तिम भएको बताएको छ। आगामी वर्षदेखि मोड सुधार कार्यक्रम नै सञ्चालन नहुने कार्यालयले जनाएको छ । सडक डिभिजन कार्यालय डोटीका इन्जिनियर अधिकारीले भने, ‘भीमदत्त राजमार्ग अन्तर्गत मोड सुधारका यी अन्तिम दुईवटा ठेक्का हुन । आगामी दिनमा यस्तो कार्यक्रम सञ्चालन हुँदैन ।
प्रतिक्रिया
सम्बन्धित खवर
