106 पटक पढिएको
काठमाण्डौ – नेपाली कांग्रेसको १४ औं महाधिवेशनको प्रक्रिया अन्तर्गत १३ जिल्लामा वडा अधिवेशन अन्योल भएको छ ।
क्रियाशील सदस्यता विवाद टुङ्गो नलाग्दा १३ जिल्लाको अधिवेशन अनिश्चित बनेको हो। विवाद रहेका जिल्लामा कार्यदलले निरन्तर छलफल गरिरहेको र एक/दुई दिनमै टुङ्गोमा पुग्ने कांग्रेस केन्द्रीय कार्यालयले जनाएको छ ।
आज विभिन्न ७ जिल्लामा वडा अधिवेशन हुँदैछ। केन्द्रीय निर्वाचन समितिका संयोजक महादेव यादवका अनुसार काठमाण्डौ, काभ्रे, मोरङ, बर्दिया, सिन्धुपाल्चोक, कपिलवस्तु र बाजुरामा वडा अधिवेशन हुन लागेको हो। प्रदेश–२ का आठ जिल्ला, सुर्खेत, डोल्पा, रसुवा, रुपन्देही र कैलाली गरी १३ जिल्लाको क्रियाशील सदस्यतामा विवाद छ ।
तीमध्ये धनुषा, कैलाली र डोल्पामा विवाद समाधान भइसकेको र अन्तिम टुङ्गोपछि निर्वाचन समितिलाई जानकारी गराउने कांग्रेस पार्टी कार्यालयका मुख्यसचिव कृष्णप्रसाद पौडेलले बताए। विवाद समाधान भएको भनिए पनि निर्वाचन समितिलाई विवरण उपलब्ध गराइएको छैन ।
यसअघि भदौ १८, २२ र २५ मा गरी ५७ जिल्लामा वडा अधिवेशन भइसकेको छ। वडा अधिवेशनकै कारण समग्र महाधिवेशन कार्यतालिका प्रभावित नहुने संयोजक यादवले बताए। कांग्रेसले असोज ९ मा गाउँ नगर अधिवेशन गर्ने कार्यतालिका तय गरेको छ ।
कांग्रेसमा लामो समयदेखि क्रियाशील सदस्यता विवादले पटक–पटक महाधिवेशन कार्यतालिका प्रभावित हुँदै आएको छ। कांग्रेसले मंसिर ९ देखि १३ गतेसम्म काठमाण्डौमा १४ औं महाधिवेशन गर्ने तय गरेको छ ।
दिनेश खबरबाट साभार
प्रतिक्रिया
सम्बन्धित खवर
