बाजुरा– दैनिक रुपमा नयाँ भेरियन्ट सहितको कोरोना भाइरस (कोभिट–१९) को लहर तिव्र रुपमा फैलिन थालेपछि स्थानीय तहले पनि संक्रमितहरुका लागि आइसोलेसन कक्ष निर्माण गरेका छन् ।
यसै क्रममा बुढीगंगा नगरपालिकाले पनि नगरका नागरिकहरुलाई कोरोना (कोभिट–१९) संक्रमण भएमा सहज रुपमा सेवा उपलव्ध गराउन साविकको दुई गा.वि.स.का स्वास्थ्य चौकीमा अक्सिजन सहितको आइसोलेसनि कक्ष निर्माण गर्ने भएको छ ।
नगरपालिकाको बाह्रविसको देवलसैन स्वास्थ्यचौकी र ब्रह्मतोलाको ब्रहमतोला स्वास्थ्य चौकी अक्सिजन सहितको आइसोलेसन कक्ष स्थापना गर्ने निर्णय गरिएको नगर प्रमुख दीपक विक्राम शाहले बताए।
मेयर शाहका अनुसार कोरोना महामारी र लगातार वर्षा हुन थालेकाले कोरोना संक्रमित विरामीलाई ल्याउन सो क्षेत्रमा एम्बुलेन्स सम्म जान नसक्ने अवस्था आउने भएकाले दुई वटै स्वास्थ्य चौकीमा अक्सिजन सहितको आइसोलेसन बनाएमा संक्रमितलाई सहज हुने शाहले बताए ।

मंगलबार बसेको कोरोना नियन्त्रण व्यवस्थापन समितिको बैठकले नगरपालिकामा गएको बैशाख २३ गतेको बाढीले वडा नम्वर १,२ र ३ वडाको क्षतिको विवरण संकलन गरी उनीहरुलाई राहत दिने र थप राहतका लागि संघ संस्थाहरु तथा प्रदेश सरकारसंग पहल गर्ने निर्णय गरेको स्वाथ्य शाखा सह संयोजक हस्तबहादुर खडायतले जानकारी दिएका छन् ।
खडायतका अनुसार नगरका दश वटै वडामा वडाध्यक्षको संयोजकत्वमा कोरोना नियन्त्रण समिति गठन गर्ने पनि निर्णय गरेको बताए ।
कोरोना (कोभिड–१९) को महामारीका बेला अग्रपंक्तिमा रहेर आइसोलेसन र स्वाव संकलनमा खटिने स्वास्थ्यकर्मीलाई जोखिम भत्ता समेत दिने निर्णय भएको छ ।
कोरोना संक्रमितको उपचारका लागि आइसोलेसनमा खटिने स्वास्थ्यकर्मीलाई ७५ प्रतिशत र स्वाव संकलन देखि अन्य कार्यमा खटिने स्वास्थ्यकर्मीलाई ५० प्रतिशत जोखिम भभत्ता दिने नगरपालिकाले बताएको छ ।