बाजुरा– जिल्लाको बडिमालिका नगरपालिकाले करार कर्मचारीको म्याद थप नगरी हटाएको छ । बिहिवार नगरपालिकामा बसेको १३ औं कार्यपालिकाको बैठकले म्याद थप गर्न नसक्ने भन्दै एक सूचना जारी गर्दै करार कर्मचारीको म्याद थप नगरिएको जानकारी गराएको हो ।

बैठकले नगरपालिकाको कार्यालय मातहतका वडा, कार्यालय,स्वास्थ चौकी सहरी स्वास्थ्य केन्द्रमा कार्यरत अन्य कर्मचारीको म्याद थप नगरी यहीँ पौष १ गतेबाट लागु हुने गरी म्याद थप नगरिएको नगरकार्य पालिकाको कार्यालयले जनाएको छ ।म्याद थप नगरिएका कर्मचारीहरुले जिन्सी तथा नगद कार्यालयमा बुझाउन समेत सूचना मार्फत आव्हान गरेको छ। साथै पेस्की लिएकाहरुले पनि यथासिघ्र फर्चौट गर्न सुचनामा भनिएको छ ।

कुन कुन कर्मचारीहरुको मात्रै म्याद थप गरियो हेर्नुस्

१. प्रधानमन्त्री रोजगार कार्यक्रम अन्तरगत कार्यालय कर्मचारी।
२. सूचना प्रबिधी अधिकृत।
३. पञ्जिकरण अन्तरगतको कर्मचारी।
४. युनिसेफ अन्तर्गतको कर्मचारी ।
५. साविकको गाउँ बिकास समितिको कार्यालयबाट समायोजन भैई आएका कर्मचारी।
६. कृषि प्रसार अधिकृत ।
७. २०७४ भन्दा अगाडि नियुक्त भएका कर्मचारी।

नगरपालिकाले गरेको यो निर्णयको भने यतिबेला चौतर्फी बिरोध भएको छ। नगरपालिकाले कार्यपालिकाको बैठक पछि सार्वजनिक गरेको सो निर्णयलाई धेरैजसोले सामाजिक संजालमा पोष्ट गर्दै नगरपालिका विरुद्ध विभिन्न टिकाटिप्पणी गरेको पाइएको छ । कर्मचारीको म्याद थप नगरी हटाउनुको पछाडि राजनीतिकरण गर्न खोजेको आरोप समेत कतिपयले लगाएका छन् । स्थानीय सरकारले नगरपालिकामा कार्यरत कर्मचारी हटाएर उनीहरुको रोजीरोटी खोसेको एक श्रोतले बताएको छ । फरक पार्टीको कर्मचारी भएकै कारण नगरपालिकाले करार कर्मचारीको म्याद थप नगरेर हटाएको श्रोतको दावी छ । यतिबेला जनताको जनमतबाट निर्वाचित जनप्रतिनिधि पार्टी केन्द्रित मात्र देखिएको भन्दै टिकाटिप्पणी समेत सुरु भएको छ । स्थानीय सरकारले रोजगारीको सिर्जना गर्नु अथवा स्वरोजगार बनाउनुको साटो उल्टै रोजिरोटी गरिरहेका कर्मचारी हटाएको भन्दै नगरपालिकाले गरेको सो निर्णयको युवाहरुले कडा बिरोध गरेका छन् । नगरपालिकाको एक आर्थिक बर्ष सकिन नपाउदै निर्वाचित जनप्रतिनिधिहरुले समय समयमा आलोचना खेप्दै आएको पाइएको छ ।

किन हटाइयो त कर्मचारी म्याद थप नहुनुको कारण के हो। यता यो बिषयमा नगरपालिकाका नगरप्रमुख अमर खड्कालाई सोध्दा नगरपालिकामा आर्थिक श्रोतको अभाव भएकाले कार्यपालिकाको बैठक बसी सवैको सर्वसहमतीमा म्याद थप नगरिएको बताएका छन् । आवश्यकता भन्दा वाहेकका कर्मचारीहरु पनि नगरपालिकामा कार्यरत रहेको हुँदा नगरपालिकामा आर्थिक भार भएकोले आर्थिक भार धान्न नसक्ने भएपछि अनावश्यक कर्मचारीहरुको म्याद थप नगरिएको बताए । कर्मचारी सामाजिक संजालमा बिरोध गर्नेहरूको काम नै बिरोध गर्ने भएकाले यसले आफुहरुलाई कुनै असर नपार्ने नगर प्रमुख खड्काले बताए ।

कर्मचारी हटाइएको बिषयलाई राजनीतिकरण गरेको भनेर आरोप लगाउनु अनुचित बिषय रहेको पनि प्रमुख खड्काको भनाई छ । उनले भने हामीले कुनै राजनीतिकरण गरेका छैनौं । कुनै एउटा संगठनको मात्र कर्मचारी हटाएका पनि छैनौं । कर्मचारी पार्टीको हुन्छन् भन्ने पनि त छैन । हामी संग आर्थिक अभाव छ धान्नै मुस्किल भैरहेको छ । यस्तो अनावश्यक आरोप लगाउन सुहाउँदैन फेरी अहिले नै कति कर्मचारी हटाउने भन्ने एकिन भैसकेको छैन पुनः आवश्यकता अनुसारका कर्मचारी राख्ने प्रयास छदै छ ।