58 पटक पढिएको
बाजुराः जिल्लाको बुढीनन्दा नगरपालिकाका ४ वटा वडामा नेपाल टेलिकमको फोर जि सेवा संचालन भएको छ ।करिव डेढ बर्षको अथक प्रयासपछि बुढीनन्दा नगरपालिकाको साविकको पाण्डुसैनलाई लक्षित गरेर बनाइएका नेपाल टेलिकमका टावरहरुबाट आजबाट फोर जि सेवा संचालनमा आएको नगरप्रमुख जनक कुमार बोहराले बताएका छन् ।
बुढीनन्दाका नगरबासीलाई टेलिफोन सेवाको पहुँचमा ल्याउने गरी बनाइएका टेलिकमका टावरबाट फोरजि सेवा संचालनमा आएको हो । बुढीनन्दा नगरपालिकाको निरन्तरको प्रयासपछि नगरपालिका भित्र नेपाल टेलिकमका बनाउन लागिएका ४ वटा टावर मध्ये पाण्डुसैन क्षेत्रको दुईटा टावर निर्माण सम्पन्न भएसंगै हिजाेबाट नगरपालिकाको ७, ८, ९ र १० नम्वर वडा साविकको पाण्डुसैनमा फोरजि सेवा सूचारु भएको नगरपालिकाले जनाएको छ ।
यस अघि सो क्षेत्रका स्थानीयहका हातहातमा मोवाइल भएपनि नेटवर्क राम्ररी नचल्दा आफन्तहरुसंग कुराकाकानी गर्नबाट बन्चित हुने गरेका थिए । अहिले स्थानीयका मोवाइलमा भरपर्दो नेटवर्कसंगै फोरजि नेटवर्क सहितको सेवा सूचारु भएपछि स्थानीयहरु खुसी भएका छन् ।नगर प्रमुख बोहराले तिहार भित्रै बुढीनन्दा नगरपालिकाका सवै वडामा फोरजि सेवा संचालन गर्ने गरी काम भइरहेको बताएका छन् । विगत वर्ष देखि राम्रोसँग टेलिफोन सेवाले काम नगर्दा सास्ती खेप्दै आएका बुढीनन्दा बासीले आजदेखि भरपर्दो फोनसेवासँगै फोर जी सेवा इन्टरनेटको पनि सुविधा लिएका छन् ।
